«Մարդիկ արդեն կարագ են բանկ դնում, որ վարկ վերցնեն, էնքան ա թանկացել». «Ելք»-ի նախագիծը մերժվեց

«Մեր առաջարկածը թաց ու չորը տարբերակող, տեղեկացնող նախագիծ է»: Այսօր ԱԺ-ում «Ելք» խմբակցության կողմից առաջարկած նախագծի քննարկման ժամանակ ասաց խմբակցության պատգամավոր, հիմնական զեկուցող Էդմոն Մարուքյանը:

Հիշեցնենք, որ «Ելք»-ի հեղինակած նախագիծը վերաբերում էր ՀՀ մասով ԵԱՏՄ պայմանագրի գործողությունները դադարեցնելու գործընթացին, որն արդեն ԱԺ-ում բացասական եզրակացություն էր ստացել:

Էդմոն Մարուքյանը հիշեցրեց իր նախորդ ելույթը, որի ժամանակ, նրա որակմամբ, «ահաբեկման ֆոնին» տեղի ունեցան «ահասարսուռ քննարկումներ»:

Նա նշեց նաև, որ իր ելույթում նախորդ անգամ խոսել էր թանկացումների մասին, ինչը չուշացավ:
Նախագիծը դրվեց քվեարկության և մերժվեց՝ 76 դեմ և 6 կողմ ձայների հարաբերակցությամբ:
Քվեարկությունից հետո Էդմոն Մարուքյանը հայտարարեց, որ ինչպես միշտ, այս անգամ էլ խորհրդարանում արձանագրվեց քաղաքական դաշտում առկա դիսբալանսը:

«Ես ձեզ առաջարկում եմ այցելել գյուղեր, մարզեր և մարդկանց բացատրել, թե ինչու են ապրանքներն ամենօրյա ռեժիմով թանկանում, կամ հունվարի 1-ից ինչու են ապրանքները թանկանալու: Մարդկանց բացատրեք, որ Հայաստանը զարգանում է, մարդկանց բացատրեք՝ ապրանքները չեն թանկացել: Մարդիկ արդեն կարագ են բանկ դնում, որ վարկ վերցնեն, էնքան ա թանկացել: Դրա՛ մասին մտածեք»,-եզրափակեց նա: