Ինչո՞ւ Ռոբերտ Նազարյանը «դուխ չի անում» խիստ դատել Սամվել Կարապետյանի ՀԷՑ-ին

Հանրային ծառայությունները կարգավորող հանձնաժողովի՝ դեկտեմբերի 6-ի նիստի օրակարգում ընդգրկված հարցերից մեկը վերաբերում է ՀԷՑ-ին տուգանելու մասին նախագծին:

Ըստ նախագծի հիմնավորման՝ հաշվի առնելով, որ «Հայաստանի էլեկտրական ցանցեր» ՓԲԸ-ն խախտել է սպառողների միջև կնքված պայմանագրերի կետերը, ընկերության նկատմամբ հարուցվել է վարչական վարույթ, և դրա շրջանակում որևէ պարզաբանում չի ներկայացվել, խախտվել են որոշ սպառողների իրավունքները, ուստի ՀԿԾՀ-ն որոշել է տուգանել այս ընկերությանը՝ տուգանքի չափ սահմանելով 5 միլիոն ՀՀ դրամը:

«Հայաստանի էլեկտրական ցանցեր» ՓԲԸ-ն հանձնաժողովի կողմից ընդունված որոշումն ուժ մեջ մտնելուց հետո պարտավոր է երկշաբաթյա ժամկետում պետական բյուջե վճարել նշված 5 միլիոն դրամը:

Հիշեցնենք, որ սա ՀԷՑ-ի տուգանքի հերթական դեպքն է. նախորդ տարի՝ 2016 թվականին, Հանրային ծառայությունները կարգավորող հանձնաժողովը որոշեց, որ էլէներգիայի հազարավոր հաշվիչներ ժամային շեղումներով են գործել: Ապրիլին ՀԷՑ-ին ժամանակ էր տրվել, որ մինչև օգոստոսի 1-ն ավարտեր հաշվիչների կարգավորման գործընթացը: Դա, սակայն, չէր իրականացվել, և պարզվում է՝ մոտ 30 հազար հաշվիչ ժամանակային շեղումով էր աշխատել. այդ տարի ՀԷՑ-ը տուգանվեց 5 մլն դրամով:

Աննախադեպ մեծ քանակի տուգանք է վճարել ՀԷՑ-ը 2015-ին՝ շուրջ 60 մլն ՀՀ դրամի չափով, իսկ 2014-ին, երբ ՏՄՊՊՀ-ի վերահսկողության տակ էր ՝ ՀԷՑ-ը 20 մլն դրամ էր տուգանվել` բնակիչներին անօրինական կերպով էլէկտրամատակարարումից զրկելու համար:

Հետաքրքրականն այստեղ հատկապես թվերի տատանումն է՝ մինչև ՀԷՑ-ի սեփականատեր Սամվել Կարապետյանը և դրանից հետո:

Փաստորեն, այն ժամանակից սկսած, ինչ ՀԷՑ-ը սկսեց պատկանել Սամվել Կարապետյանին, Ռոբերտ Նազարյանը կտրուկ իջեցրեց տուգանքների չափը՝ հավանաբար աչք փակելով էական խախտումների վրա: Ի՞նչ խոսք, 60 միլիոնից անցումը 5 միլիոնի խիստ ակնառու է: