Ո՞ւմ մեղքով է Երևանում աղբը «բարձրանում ավտոբուս» (ֆոտոշարք)

Այն, որ Երևանում աղբահանության աշխատանքները ժամանակին ու հավուր պատշաճի չեն կատարվում, երկրորդ կարծիք լինել չի կարող: Իհարկե, այս հարցում մեղքի մեծ բաժինն ընկնում է «Սանիթեք» ՍՊԸ-ի ու նրա հետ պայմանագիր կնքած՝ Երևանի քաղաքապետարանի վրա:

Քաղաքապետարանը քաղաքի աղբահանության հարցը պայմանագրով հանձնել է ընկերությանն ու ձեռքերը լվացել, մի կողմ է քաշվել պատասխանատվությունից: «Սանիթեք»-ն էլ, հավանաբար, հենց նույն պատասխանատվության բացակայության պատճառով՝ մատների արանքով է նայում գործին:

Որքան էլ պատկան մարմիններն «իրենց մեջից ճղեն» ու փորձեն համոզել, թե աղբահանությունը ժամանակին է կատարվում, միևնույնն է՝ անմաքուր քաղաքն իր դեմքը ցույց է տալիս: Իսկ ավելի կոնկրետ՝ աղբով լցված աղբամանները՝ քաղաքապետարանի և «Սանիթեք»-ի դեմքն են, քանի որ հենց նրանց աշխատանքի բարձիթողի վիճակի պատճառով մենք ունենք այն, ինչ ունենք:

Իհարկե, պատկան մարմինները սիրում են հակադարձել և ասել, որ մեղքը քաղաքացիներինն է, բայց ուշադրություն. այն, որ քաղաքացիներն աղբը լցնում են ոչ թե աղբամանի մեջ, այլ դրանից դուրս, պատճառը պարզ է՝ աղբամաններից աղբը երկար ժամանակ չի հեռացվում, և դրանք արդեն լցված են լինում:

Կա մեկ ուրիշ հարց ևս. աղբամաններն իրենց ժամանակն ապրել են և դրանք բարոյապես ու ֆիզիկապես մաշվել են: Բայց թե՛ քաղաքապետարանը, թե՛ այս պարտավորությունն ստանձնած ընկերությունը հոգ չեն տանում նոր աղբամաններ դնելու կամ հարկ եղած վայրերում աղբամանների թիվն ավելացնելու համար:

Այս աղբամանները NEWSPRESS.am-ի թղթակիցը լուսանկարել է Ծարավ Աղբյուրի փողոցում: Աղբաման հասնելու կես ճամփին մնացած, իսկ ավելի կոնկրետ էլեկտրական լարերից կախված այս աղբով լցված տարայի ճակատագիրը տնօրինել են տեղի բնակիչները: Նրանք, հավանաբար, գերագնահատելով իրենց ուժերն ու ցանկանալով հենց իրենց տան դիմացից աղբը նետել աղբամանի մեջ՝ ստացել են այս պատկերը. աղբը չի հասել աղբամանին:

Սակայն այստեղ մեղքը դարձյալ պատկան մարմիններինն է. տեղադրված աղբամաններն արդեն ի զորու չեն իրենց մեջ աղբ պահելու, դրանք պետք է փոխել նորերով, բայց ո՛չ քաղաքապետարանին, ու ո՛չ էլ Քանաքեռ-Զեյթուն վարչական շրջանի ղեկավարին չի անհանգստացնում, որ աղբը մարդիկ չեն կարող թափել չեղած աղբամանի մեջ: Այս անտարբերությունը փոխանցվել է քաղաքացիներին, ովքեր սեփական քաղաքի նկատմամբ կորցրել են սրտացավությունը:

Չկա սրտացավ վերաբերմունք ո՛չ վերևներում, ո՛չ ներքևներում:

Մինչդեռ քաղաքապետարանը պետք է այս հարցը կոշտ դնի, ու ավելի հետևողական լինի խնդրին, պատժամիջոցներ կիրառվեն… Մի խոսքով՝ անել ամեն ինչ, որ քաղաքը մաքրվի աղբից: Իսկ քանի դեռ չկա նման վերաբերմունքը՝ ուղիղ և անուղղակի իմաստով, ցանկացած աղբ կարող է «թևեր առնել» ու «բարձրանալ ավտոբուս»՝ այլևս չիջնելու նպատակով:

NEWSPRESS.am