«Կապիկների համաշխարհային միությունն» արտոնագիր է տվել Միհրան Պողոսյանին

Լուսանկարը՝ «Ֆոտոլուր»-ի

Ո՞վ է նա: Դեռևս գեներալ-գնդապետ է և մայոր, տնտեսագիտության թեկնածու է, պրոֆեսորի կոչում ունի, օպերլիազոր է և արդարադատության գեներալ-մայոր:

Եթե որևէ մեկ չճանաչեր Միհրան Պողոսյանին, կրոնափոխ կլիներ. առաջին հայացքից մարդը կրթություն է ստացել, տնտեսագետ է, բիզնեսներով է զբաղվում: Կարճ ասած՝ իսկական պրոֆեսոր: Սա Միհրան Պողոսյանի առերևութական առաջին կյանքն է, իսկ մյուս՝ կողմից նա է Հայաստանում բանանի միակ ներկրողը. Կապիկների համաշխարհային միությունը միայն Միհրան Պողոսյանին է արտոնագիր տվել իրենց սննդի ներկրումով զբաղվել Հայաստանում. սա էլ նրա երկրորդ կյանքն է:

Նա նաև օֆշորագետ է` միակն իր տեսակի մեջ` յուրայինների շարքում. սա էլ նրա երրորդ կյանքն է:
Որ նա դոկտոր-պրոֆեսոր-տնտեսագետ-գեներալ-մայոր և այլն, և այլն է, մարդու շունչ է կտրվում այսքան կոչումներից ու պրոֆեսորների անձրևից:

Իսկ ահա բանանի ներկրումով արդեն բանանակերների շունչն է կտրվում: Կարճ ասած՝ Կապիկների համաշխարհային միության կողմից տրված արտոնագրի շնորհիվ էլ, ի դեպ, Պողոսյանը մինչև այսօր կապ է պահում Կապիկների համաշխարհային միության հետ: Բարիդրացիական հարաբերություններ են, նա բանան է ներկրում Հայաստան` միակն ու անկրկնելի ներկրողն է:

Կապիկները նաև արտոնել են, որ միայն նրա բանանն է լավագույնը ողջ տարածաշրջանում, և եթե Կապիկների համաշխարհային միությունը նման հավաստագիր է տվել, ուրեմն այդպես է որ կա:

Բացի այդ, նա Կապիկների համաշխարհային միությունից աջակցություն ունի, Հայաստանում գործում են զինված կապիկների խմբեր, որոնք առգրավվում են անօրինական կերպով Հայաստան ներկրված բանանը` հօգուտ օրինական և′ միակ, և′ անկրկնելի, և′ անզուգական բանանաներկիր Միհրան Պողոսյանի:

Ինչ վերաբերում է օֆշորագետին, ապա գաղտնազերծվել են Պողոսյանի՝ Բրիտանական Վիրջինյան կղզիներում, Պանամայում, Սեյշելներում, Բահամյան կղզիներում, Նևադայում, Հոնկ Կոնգում, Միացյալ Թագավորությունում, Բելիզում, Կոստա Ռիկայում, Մալթայում, Նոր Զելանդիայում, Կիպրոսում, Սինգապուրում և մի քանի այլ վայրերում գրանցված միլիոնավոր օֆշորային ընկերությունների փաստաթղթեր։

Ի դեպ, չար լեզուներն ասում են, որ օֆշորագետների մեջ են նաև Պողոսյանի քեռիները՝ Գրիգորի և Միխաիլ Հարությունյանների ընտանիքների անդամները:

Նշենք, որ Պողոսյանը մասնագիտական կարիերան սկսել է Ազգային անվտանգության ծառայությունից, իսկ ԱԱԾ պետի ֆինանսական գծով տեղակալը եղել է Գրիգորի Հարությունյանը՝ Միհրան Պողոսյանի քեռին։

Ամփոփ. Ասում են, որ Միհրան Պողոսյանն ապաշխարել է՝ ո′չ կաշառք է վերցնում, ո′չ էլ տալիս, ո′չ օֆշոր է գնում, ո′չ էլ օֆշորից է ընդունում, բայց դարձյալ մնում է գեներալ-մայոր, օֆշորագետ, քեռիները տեղում են, միլիոնները՝ ապահով, բանանը հոսում է ջրի պես. բոլոր պարերը պարել է, մնացել է բարեգործության պարը:

NEWSPRESS.am