«Իբր իմ հոգսը քիչ էր, Նոր տարին էլ էնտեղից եկավ». տարեցտարի Ամանորը հեռանում է (տեսանյութ)

Որպես կանոն, նախատոնական առևտուրը միշտ եռակի մեծ ծավալ է ունենում մյուս ամիսների համեմատ։ Ամանորից ամանոր ավելանում են նաև մարդկանց ծախսերը: Գնաճի վերաբերյալ կանխատեսումներ անել այնքան էլ հեշտ չէ, քանի որ գներն օրեցօր են աճում, սակայն մոտավոր պատկերացում կա, թե հատկապես այդ օրերին, որ սննդամթերքների գները կարող են բարձրանալ:

Նոր տարվա սեղանի մոտավոր հաշվարկները ցույց են տալիս, որ սովորական ավանդական սեղան ունենալու համար ամենաքիչը անհրաժեշտ է 100 000 դրամ:

Եթե յուրաքանչյուր մրգից գնենք ընդամենը մեկ կիլոգրամ, ընդհանուր հաշվարկով դա կարժենա մոտ 8000 դրամ: Բանջարեղենի համար ևս մոտավոր հաշվարկներով այդչափ պետք է ծախսել: Ու քանի որ այդ «չարազ» կոչվածը բավականին ծախսատար է, ուստի աղանդերի 3-4 տեսակի՝ ընկույզ, պնդուկ, պիստակ և չամիչ գնելու համար՝ յուրաքանչյուրից կես կգ, մոտ 10 000 դրամ է հարկավոր:

Հարկավոր է գոնե այդքան էլ չրերի տեսականի, որի համար դարձյալ կես կգ գնելու դեպքում կծախսվի նույնքան գումար: Այնպես որ` արդեն ունենք ծախսված 46 000 դրամ, բայց չունենք քաղցավենիք՝ կոնֆետներ, խմորեղեն, մսի տեսականի, բաստուրմա, սուջուխ, երշիկ և աղցաններ:

Տոնական օրերի սեղանն այս բոլոր հաճույքներով լցնելու համար մի քանի ամսվա միջին աշխատավարձ է պահանջվում: Մի խոսքով՝ նախատոնական պատրաստությունները տարեցտարի վերածվում են իսկական հոգսի, որին արձագանքում են մոտավորապես այսպես. «Իբր իմ հոգսը քիչ էր, Նոր տարին էլ էնտեղից եկավ»:

Այնպես որ՝, ինչպես ասում են, տարեցտարի՝ ամեն տարի Նոր տարին հեռանում է:

«Նաիրիտի» նախկին աշխատակից Նորիկ Ղահրամանյանը, NEWSPRESS.am-ի հետ անդրադառնալով ամանորյա գնումներին ու տոնակատարությանը, նշեց, որ արդեն մի քանի տարի է, ինչ Նոր տարուն ոչ ոքի տուն չեն գնում և հյուրեր չեն ընդունում. չեն ուզում մարդկանց վատ վիճակի մեջ գցել:

«Ճոխ սեղան էլ չենք գցում, բայց որ ասեմ՝ չենք գցի սեղան, դա էլ սուտ կլինի: Առաջվա սեղանը չի իհարկե, բայց աշխատում ենք՝ այն, ինչ ավանդական է, պահենք սեղանին ու զարդարանքը տեղը լինի»,-ասում է Նորիկ Ղարհամանյանը:

Մանրամասները՝ տեսանյութում