Գատուզոն կփորձի Միլանին դարձնել պայքարող թիմ

Օրեր առաջ պաշտոնից հեռացվեց իտալական Միլանի գլխավոր մարզիչ Վինչենցո Մոնտելան, ում փոխարինեց կարմիր-սևերի նախկին ֆուտբոլիստ՝ Ջենարո Գատուզոն, ով հանդիսանում էր Միլանի երիտասարդական թիմի մարզիչը։ Արդեն հիմա իտալական մամուլը քննարկում է Գատուզոյի մարզչական աշխատանքի, տակտիկական փոփոխությունների ու թիմի նոր խաղի մասին։ Մասնագետներից շատերը նշում են, որ Գատուզոյին չի հաջողվի արդյունքի հասնել, և նա վերջնականապես կտապալի չինացիների նախագիծը։ Ոմանք էլ Միլանի լեգենդին սկսեցին համեմատել Զինեդին Զիդանի ու Դիեգո Սիմեոնեի հետ։

Նախ պետք է նշել, որ նոր մարզչի պաշտոնում անցկացրած առաջին ասուլիսների ժամանակ Գատուզոն պաշտպանեց Մոնտելային ու ընդգծեց, որ նա նույնպես ամեն խաղի թիմի կազմ դուրս կբերի նոր ֆուտբոլիստների։ Նա ընդգծեց նաև, որ թիմը շարունակելու է խաղալ 3-4-3 և 3-4-2-1սխեմայով։

Պետք է ընդգծել, որ ամառային տրանսվերային պատուհանի ժամանակ Միլանը գնեց այնպիսի ֆուտբոլիստների, որ թիմը կարողանա խաղալ 3-5-2 կամ 3-4-3 գերհարձակվողական սխեմաներով։ Մոնտելայի Միլանը վերջին խաղերում հանդես էր գալիս լավ, սակայն չկային գոլեր և վաստակած միավորներ։ Հարցազրույցների ժամանակ թիմի ավագ Լեոնարդո Բոնուչին ընդգծեց, որ Միլանին պակասում է համառությունն ու բնավորությունը։ Թիմի սեփականատերերը տեսնելով, որ բնավորությունը չի ավելանում, հեռացրեցին Մոնտելային։

Ֆուտբոլային բնավորության մասին խոսելիս Գատուզոյին շրջանցելն առնվազն հիմարություն կլինի։ Արդեն հիմա իտալական լրատվամիջոցները նշում են, որ մարզումների ժամանակ Գատուզոն ֆուտբոլիստներին սովորեցնում է վազել շատ ու կատարել մեծ արագացումներ, խաղի սկզբում մրցակցին ճնշել ու գնդակներ խլել։ Գատուզոն կփորձի Միլանին դարձնել պայքարող թիմ, իսկ ֆուտբոլիստներին կդարձնի գնդակի համար կյանք տվող մարտիկներ։

Այդպիսին դարձավ Սիմեոնեյի Ատլետիկոն ու պատահական չէ, որ մասնագետները նմանատիպ կանխատեսումներ են անում։ Իվան Ահեղը պահպանեց Մոնտելայի տակտիկական սխեման ու հիմա կփորձի այդ սխեմայում խաղացող ֆուտբոլիստներին դարձնել ֆիզիկապես ամուր, պայքարով, հակառակորդին ճնշող ու արդյունքի հասնող։

Մնում է միայն սպասել ու տեսնել, թե ի՞նչ փոփոխություններ տեղի կունենան Գատուզոյի Միլանում։