Հայաստան մատակարարվող գազի գինը չի փոխվի՝ 150 դոլար

ՀՀ կառավարության նիստում հավանություն տրվեց «Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետություն բնական գազի առաքման ժամանակ գների ձևավորման կարգի վերաբերյալ 2013 թվականի դեկտեմբերի 2-ի Համաձայնագրում փոփոխություններ կատարելու մասին» արձանագրության կնքման առաջարկությանը:

«Ընդունելով էներգետիկ շուկաների և գազատրանսպորտային ենթակառուցվածքների զարգացման կարևորությունը, ինչպես նաև գազամատակարարման հուսալիության ապահովման անհրաժեշտությունը, ելնելով ՀՀ տնտեսության համար համակարգաստեղծ ձեռնարկության՝ «Գազպրոմ Արմենիա» փակ բաժնետիրական ընկերության կայուն տնտեսական վիճակի պահպանման շահերից, և հաշվի առնելով «Գազպրոմ Արմենիա» փակ բաժնետիրական ընկերության գործունեության մեջ Կողմերի պետությունների փոխադարձ հետաքրքրությունը, «2017թ. դեկտեմբերի 31-ը» բառերը փոխարինել «2018թ. դեկտեմբերի 31-ը» բառերով»,-նշված է նախագծի հիմնավորման մեջ:

ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը նշեց, որ մոտ մեկ ամիս առաջ ՌԴ ու ՀՀ վարչապետների հանդիպման ժամանակ ձեռք է բերվել համաձայնություն, որով սահմանվել է` այս համաձայնագիրն ամրագրվում է այս փոփոխությամբ,ըստ այդմ, մինչև 2018 թվականի ավարտը ՀՀ ներկրվող ռուսական բնական գազի գինը մնում է անփոփոխ:

Վարչապետ Կարեն Կարապետյանը հիշեցրեց, որ 2018-ին սոցիալապես անապահով խմբերի, ջերմոցատերերի և վերամշակող ձեռնարկությունների համար կտրվեն արտոնություններ:

Նշենք, որ Ռուսաստանը բնական գազի գինը Հայաստանի համար սահմանել է 1000 խմ-ի համար 150 դոլար: