Ժոզեն փորձում է վերջնականապես «թաղել» Հենոյին. Մխիթարյանն այս ձմռանը կհեռանա՞ «Մանչեսթերից»

Անգլիական մամուլն արդեն նոր ակումբ է փնտրում Հենրիխ Մխիթարյանի համար: Անգլիացիներից հետ չեն մնում նաև հայերը, ովքեր նույնպես փորձում են նոր ակումբ գտնել Հենոյի համար: Վերջին խաղերում Մխիթարյանի բացակայությունն ու Ջեյսի Լինգարդի փայլուն խաղը կոտրեցին հայ երկրպագուների սպասումները: «Մանչեսթերի» նախկին ֆուտբոլիստներն ու անգլիացի մասնագետները շարունակում են քննադատել հայ կիսապաշտպանին ու նշել, որ թիմի փլեյմեյքերի պարտականությունները հիմա կատարում է Պոլ Պոգբան, ում մոտ այդ ամենը լավ է ստացվում:

Հստակ երևում է, որ Ժոզեն փորձում է վերջնականապես «թաղել» Հենոյին, բայց մյուս կողմից էլ հայ կիսապաշտպանը գտնվում է շատ վատ մարզավիճակում: Մոտենում է ձմեռային տրանսֆերային պատուհանը, որի ժամանակ այս հարցը կստանա իր տրամաբանական լուծումը: Կամ Մխիթարյանը կտեղափոխվի այլ ակումբ, կամ էլ կշարունակի իր մարզավիճակը բարելավել պահեստայինների նստարանին:

Մեծ հաշվով այս ճակատամարտի ելքը որոշելու են Ժոզե Մոուրինյոն ու Մխիթարյանը: Եթե «Մանչեսթերը» Մխիթարյանին հանի վաճառքի, ապա նրան կցանկանան գնել մի շարք գրանդ ակումբներ: Արդեն պտտվում են խոսակցություններ այն մասին, որ Դորտմունդի «Բորուսիան» ցանկանում է թիմ վերադարձնել հայ կիսապաշտպանին:

Դեռ Դորտմունդում ելույթ ունենալու տարիներն Մխիթարյանի նկատմամբ մեծ հետաքրքրվածություն ուներ «Յուվենթուսի» գլխավոր մարզիչ Ալեգրին: Չպետք է մոռանալ նաև «Լիվերպուլին», քանի որ թիմի գլխավոր մարզիչ Յուրգեն Կլոպը միշտ էլ դրական է արտահայտվել Հենոյի մասին և գերմանացի մասնագետն ամենից լավն է ճանաչում հայ ֆուտբոլիստին:

Խոսակցություններ կան, որ Մադրիդի «Ռեալը» նույնպես հետևում է Հենոյի մրցելույթներին: Մխիթարյանի կարգավիճակում ժամանակին հայտնվել են Խուան Մատան, Դավիդ Լուիզը, ովքեր Ժոզեից հեռանալուց հետո կարողացել են ցույց տալ իրենց լավագույն որակներն ու դառնալ նոր թիմի գլխավոր ֆիգուրները:

Սակայն կարևոր խնդիրներից մեկն էլ այն է, որ Մխիթարյանն իրոք գտնվում է վատ մարզավիճակում, և այս պարագայում Մոուրինյոյի որոշումը ճիշտ է: Միգուցե նա հեռանա ակումբից ու նոր ակումբում շարունակի հանդես գալ վատ մրցելույթներով ու վերջնականապես տապալի իր կարիերան: Պետք է չմոռանալ նաև, որ մեր ազգի պարծանքն արդեն 28 տարեկան է, որը ֆուտբոլում համարվում է ուժերի նվազման տարիք (Լեոնել Մեսսին, Ռոնալդուն ու Իբրահիմովիչը սովորական մարդիկ չեն): Միայն ժամանակը, իրադարձությունների զարգացումն ու ձմեռային տրանսֆերային պատուհանը ցույց կտան, թե ի՞նչ հանգուցալուծում կստանա Մխիթարյանի ապագայի հարցը:

NEWSPRESS.am