Ծառուկյանը «թաքցնելու» ունի

Արդեն բակավան ժամանակ է, որ ԲՀԿ-ականները մեղադրանքների տարափ են տեղում կառավարության, ՊԵԿ-ի, բյուջեի և այն բոլորի վրա, ինչ առնչվում է Կարեն Կարապետյանի հետ: Պատճառը ՊԵԿ-ի ստուգումներն են Գագիկ Ծառուկյանի գործարաններում և ընկերություններում:

Պարզվում է, որ մոտ 60 տարբեր գործարանից, օբյեկտից, առևտրի կենտրոնից ստուգվում են ընդամենը «Առինջ մոլ»-ը, «Եվրոմոթորս»-ը, «Օնիրա քլաբ» ՍՊԸ-ն, Երևանի Արարատ կոնյակի գործարանը, «Մուլտի ռեստ»-ը:

ԲՀԿ-ականներն Ազգային ժողովում հասցնում են Գագիկ Ծառուկյանի ուղերձը՝ թողեք աշխատեմ, իսկ թե ինչպե՞ս, արդեն այլ հարց է:

Նախ ՊԵԿ-ը պարտավոր է ստուգումներ անցկացնելու, հետո՝ գաղտնիք չէ, որ խոշոր եկամուտներ ունեցողները թաքցնում են նաև խոշոր եկամուտներ, և եթե ծառուկյանական օբյեկտներն զգուշանալու խնդիր չունեն ու աշխատում են ազնիվ-արդար, որի մասին ոչ մեկ անգամ է ասել Գագիկ Ծառուկյանը, ապա ՊԵԿ-ը պարզապես իր գործն է անում:

Գուցե Ծառուկյանը դե՞մ է, որ պետական ինստիտուտները նորմալ աշխատեն, թե՞ խոսքը վերաբերում է բոլորին, բայց ոչ իր օբյեկտներին: Գուցե ծառուկյանական ընկերությունները հավասարների մեջ ավելի՞ հավասար են:

Եթե ամեն մեկը պետական որևէ կառույցից դժգոհությունները հայտնի Ազգային ժողովում՝ միայն սեփական շահերը պաշտպանելու համար, ապա կստացվի, որ ԱԺ-ն ոչ թե երկրի խնդիրներին լուծում տալու համար է, այլ օլիգարխների դժգոհությունների ամբիոն, որտեղից փոխօլիգարխները տարբեր խոսափողների միջոցով կսկսեն դժգոհել, թե չեք թողնում հանգիստ աշխատենք-ապրենք:

Հակառակը՝ Ծառուկյանը ՊԵԿ-ի ստուգումների միջոցով կարող է իր խոսքերն ապացուցել, թե իր գործարանները, կենտրոնները, հիմնադրամները, օբյեկտները մաքուր են աշխատում: Սակայն, ինչպես երևում է ԲՀԿ-ականների պահվածքից, Ծառուկյանը «թաքցնելու» ունի:

NEWSPRESS.am