Կարեն Կարապետյանի հարցազրույցը քաղաքական նոր հայտ է ապագայի համար

Վարչապետ Կարեն Կարապետյանը հանդես եկավ հարցազրույցով, որն ավելի շատ առնչվում էր հենց նրա մարդ տեսակին և ո՛չ թե գործունեությանն ու քաղաքա-տնտեսական հեռանկարներին: Թեմայի շուրջ NEWSPRESS.am–ը զրուցեց Գերագույն խորհրդի պատգամավոր Ազատ Արշակյանի հետ:

-Պարո՛ն Արշակյան, Կարեն Կարապետյանը վարչապետի պաշտոնն ստանձնելուց անմիջապես հետո հայտարարեց, թե «եթե զգա, որ չի կարողանալու օգուտ տալ երկրին` մեկ օր ավել չի մնա պաշտոնում»։ Այժմ նա հանդես է եկել հարցազրույցով, հնարավո՞ր է արդյոք, որ այդ հարցազրույցը նշանակում էր՝ «ներեցեք, ինձ մոտ ոչինչ չստացվեց, ես հեռանում եմ»:

-Կարծում եմ, որ ինքն ընդհանրապես իր մուտքի հարցազրույցին չի անդրադարձել: Սա նոր մուտք է, նոր ծրագիր է, ինչպես ասում են՝ նոր էջ է սկսում: Իսկ ձախողվելը կամ հաջողվելը՝ տարին վերջանում է և իր հետ տանում: Հայտարարության մասին խոսք չկար այդ հարցազրույցում, բոլորովին նոր հարցազրույց էր… Կարճ ասած՝ այս հարցազրույցը նոր ծրագիր էր, ես այն նույնիսկ կանվանեի նախընտրական ծրագիր, քանի որ նախընտրական ծրագրում ձախողումների, թերությունների և անհաջողությունների մասին չեն խոսվում: Սա լրիվ ինքն է ներկայանում՝ որպես անձնավորություն:

-Այսինքն՝ Դուք հրաժեշտի երանգ չե՞ք տեսնում:

– Ո՛չ, հրաժեշտի երանգ չեմ տեսնում: Հակառակը՝ իմ կարծիքով՝ դա նոր մուտք է, քաղաքական նոր հայտ՝ ապագայի համար: Նա գալիս է, գալիս է՝ նոր ծրագրով և նոր քաղաքական օրակարգով, բայց օրակարգը դեռ կշարադրի:

-Մեր նախորդ հարցազրույցներից մեկում Դուք ասել էիք, որ «վարչապետը քրեաօլիգարխիկ համակարգի զոհը դարձավ», այսօր Դուք նրան որպես «զո՞հ» եք տեսնում:

-Այո՛, վարչապետը քրեաօլիգարխիկ համակարգի զոհը դարձավ. Հայաստանում այլ ձև չկա: Իշխանությունը հենց էդպիսին է, եթե որևէ մեկը Հայաստանում իշխանության մաս է կազմում, ուրեմն քրեաօլիգարխիկ համակարգի մաս է կազմում: Ճիշտ այդպես կարող եմ ասել, որ Հայաստանում ո՛չ ռուսամետ իշխանություն չկա, եթե որևէ մեկն իշխանության մասն է կազմում, նա ուրեմն ռուսամետ է: Արևմտամետ քաղաքական գործիչ իշխանության մեջ չկա: Այս առումով Կարապետյանը մյուսներից չի տարբերվում: Ինքը ռուսամետ է, ռուսոֆիլ: Այնպես որ՝ նրան չի կարելի դրանում մեղադրել, որովհետև կառավարությունում և ընդհանրապես իշխանությունում էն մյուսները, բոլորն էլ ռուսամետ են, իսկ ռուսամետ նշանակում է քրեաօլիգարխիկ: Ռուսական օրենտացիան նույնն է, ինչ որ քրեաօլիգ օրիենտացիան: Այնպես որ՝ Կարեն Կարապետյանը մյուսներից չի տարբերվում:

-Դուք՝ ինքներդ, արձանագրե՞լ եք որևէ տեղաշարժ Կարեն Կարապետյանի վարչապետության օրոք, և ի՞նչ կարելի է սպասել հետայսու, եթե նա իսկապես հրաժեշտ չի ուզում տալ պաշտոնին:

-Ոչ մի տեղաշարժ չեղավ. հատուկ որևէ բան չի արել և երևի չի էլ անի, բայց ի՞նչ կանի՝ չգիտենք:

-Կարծում եք, որ այնուամենայնիվ դրական տեղաշարժե՞ր դեռ կլինեն:

-Հույսը պետք է միշտ ունենալ, որովհետև միշտ էլ անակնկալներ են լինում մեր կյանքում: Որպես անակնկալ՝ սպասենք Կարեն Կարապետյանից լավ բան:

Զրուցեց Արմինե Մկրտումյանը