«Ա՛յ տնաշեններ, Ֆեյսբուքում հրճվում եք, որ ԵՄ հուշագիրը հաջողված էր». Աշոտյանը ծաղրել է երեսփոխան ընդդիմախոսներին

«Ա՛յ տնաշեններ, ընդունեք, որ ԵՄ-ի հետ ստորագրած փաստաթուղթը Հայաստանի հաղթանակն էր, հաջողության պատմությունը: Հակառակ պարագայում ձեզանից շատերն այդ օրը Ֆեյսբուքում հրճված չէին լինի»:

Այսօր խորհրդարանում ԵՏՄ-ից դուրս գալու նախագծի հանրային լսումների ժամանակ հայտարարել է ԱԺ Արտաքին հարցերի հանձնաժողովի նախագահ, Հանրապետական խմբակցության պատգամավոր Արմեն Աշոտյանը:

Նրա այս հայտարարությունը թերևս ունի իր հիմքերը:

Որոշ քաղաքական գործիչներ, ովքեր հռետորական ելույթներով պրոպագանդում էին, թե ինչ վատ սովորություններ ու երևույթներ կարող են մուտք գործել Հայաստան՝ ԵՄ անդամակցությամբ, և հետևողականորեն պայքարել են Հայաստանի ժողովրդավարացման համար՝ հռչակագրի ստորագրումից հետո, Ֆեյսբուքը ողողել են ռուսամետ ու ռուսամոլ հայտարարություններով այնպես, որ կարելի է մտածել, թե մինչ այդ իրենք չեն քարկոծել ԵՄ-Հայաստան դաշինքը:

Սա արդեն իսկ լուրջ խնդիր է. քանի որ քաղաքական երեսփոխան գործիչներն ու կուսակցությունները, որոնք պատրաստ են իրենց արջի ծառայություններով գոհացնել միաժամանակ մի քանի կառույցների՝ այս պարագայում կարող են հառնել մեռելներից ու իրենց ինքնաբուխ գործունեությամբ՝ տանել Հայաստանը սխալ ուղղությամբ:

Հենց այդ չստացված ընդդիմախոսներն էլ Աշոտյանին ու նրա կուսակիցներին թույլ են տալիս ծաղրանքով վերաբերվել ոչ հայանպաստ քայլերի դեմ իրական պայքարողներին ու ծիծաղելով հայտարարել, թե «այ տնաշեններ, մի քողարկվեք, մի ծպտվեք, առանց վախենալու հայտարարեք, որ ՀՀԿ-ն լավ բան է արել ու ասեք, որ ստացվել է… մենք զգացել ենք, որ դուք դա գիտեք»: