ԵՏՄ-ն չի համապատասխանում հայ ժողովրդի շահերին. քաղաքագետ

ԵՏՄ-ում գտնվելու բոլոր երկրների նպատակներն ու մոտիվացիաները տարբեր են:

Սա այն առաջին թեզն է, որով, Գլոբալիզացիայի և տարածաշրջանային համագործակցության կենտրոնի ղեկավար Ստեփան Գրիգորյանի դիտարկմամբ, օբյեկտիվ ու սուբյեկտիվ տեսանկյունից ԵՏՄ-ն չի համապատասխանում հայ ժողովրդի շահերին:

Նա Ազգային ժողովում ԵՏՄ-ից դուրս գալու նախագծի հանրային լսումների ժամանակ ընդհանուր առմամբ առանձնացրեց նման 10 գործոն:

Առաջին եռյակում՝ երկրորդ խանգարող հանգամանքը, Ստեփան Գրիգորյանի խոսքով, այն է, որ Հայաստանը չունի ընդհանուր ցամաքային սահման ԵՏՄ անդամ երկրների հետ, ինչն ավտոմատ սահմանափակում է մեր հնարավորություններն այդ ինտեգրացիոն գործընթացում:

«Երրորդ գործոնն ամենակարևորներից մեկն է՝ Ռուսաստանը ոչ էլ ցանկություն է հայտնում վերանորոգել Վերին Լարսի ճանապարհը: Մեր բեռներն առանց պրոբլեմի հատում են Վրաստանի տարածքը, մտնում են Վերին Լարս, և սկսվում են մեր խնդիրները: Ի՞նչ է, Ռուսաստանի համար դժվա՞ր է վերանորոգել այդ ճանապարհը: Դա ապացուցում է, որ սա Ռուսաստանի համար քաղաքական պրոյեկտ է»,- ասաց Ստեփան Գրիգորյանը:

Թվարկելով հնարավոր մյուս բոլոր բացասական ազդեցությունները՝ կապված ԵՏՄ անդամակցության հետ, Ստեփան Գրիգորյանը նշեց նաև 2015 թվականի մարտի 3-ին ՌԴ սահմանադրական դատարանի կողմից կայացրած որոշումը, ըստ որի՝ Ռուսաստանի ներքին օրենսդրությունը գերակա է ԵՏՄ շրջանակներում ստորագրված պայմանագրերից. «Դա նշանակում է, որ այն, ինչ ՌԴ օգտին է՝ աշխատում է, իսկ երբ Ռուսաստանի օգտին չէ, աշխատում է այս որոշումը: Ես դիմում եմ մեր պատգամավորներին՝ ուսումնասիրել այդ որոշումը, քանի որ դրա տակ են ընկնում շատ սահմանափակումներ: Դա Հայաստանի համար լրջագույն խնդիրներ կստեղծի»,- ասաց Գրիգորյանը:

Նա առաջ քաշեց երեք առաջարկություն, որոնք Հայասատանը պետք է ներկայացնի ԵՏՄ նախագահական խորհրդում:

Նախ Հայաստանը պետք է բարձրացնի այն որոշումների հարցը, որոնք դեմ են ՀՀ քաղաքացիներին ու Հայաստանի շահերին, և պետք է վետոյի իրավունքն օգտագործեն:

Այնուհետև Հայաստանի ՍԴ-ն պետք է ուսումնասիրի ՌԴ ՍԴ-ի որոշումը, որը սահմանափակում է Հայաստանի հասարակության իրավունքները: Եվ երրորդ կետով՝ Եթե Իրանը չի ստորագրում ԵՏՄ հետ Ազատ առևտրի համաձայնագիրը, ուրեմն Իրանի հետ մեր սահմափակումները կշարունակվեն:

«Այս երեք առաջարկությունների ուղղությամբ, եթե առաջընթաց չլինի, Հայաստանը պետք է ԵՏՄ-ից դուրս գալու գործընթաց սկսի»,-ընդգծեց քաղաքագետը: