«ՀԺ». Բագրատաշենի մաքսակետում ԱԱԾ սահմանապահները 15 հոգով դաժան ծեծի են ենթարկել քաղաքացուն 

«Հայկական ժամանակ» թերթը գրում է.

«Նոյեմբերի 19-ի երեկոյան Բագրատաշենի սահմանային անցակետում ԱԱԾ սահմանապահները դաժան ծեծի են ենթարկել մի քաղաքացու:

Մեր տեղեկություններով՝ այդ օրը Բագրատաշենի սահմանային անցակետում ՀՀ ԱԱԾ սահմանապահները ստուգման նպատակով կանգնեցրել են «Մերսեդես Բենց» մակնիշի մի ավտոմեքենա: Նրանց պահանջով ուղևորը բացել է մեքենայի բեռնախցիկը: Մեքենայի վարորդը՝ 34-ամյա Ա. Կիրակոսյանը տեսնելով, որ ընկերոջ հետ սահմանապահները կոպիտ են խոսում, իջել է մեքենայից և փակել մեքենայի բեռնախցիկը, ինչից հետո վիճաբանություն ու քաշքշուկ է սկսվել վարորդի ու սահմանապահների միջև: Վարորդն էլ զանգահարել է աներորդուն՝ Կ. Շիվանյանին և կանչել մաքսակետ՝ օգնության: Երբ Շիրվանյանը ժամանել է, սահմանապահները 15 հոգով նրան դաժան ծեծի են ենթարկել՝ աշխատասենյակից աշխատասենյակ տեղափոխելով:

Ծեծից հետո տղամարդն իր մոտ եղած դանակով վնասել է սահմանապահներից մեկի կոկորդը, վերջինս, սակայն թեթև քերծվածք է ստացել: Նրան համապատասխան բուժօգնություն է ցուցաբերվել: Սահմանապահների կողմից դաժան ծեծի ենթարկվելու հետևանքով Շիրվանյանը մարմնական բազմաթիվ վնասվածքներ է ստացել: Ի դեպ, ծեծկռտուքին բազմաթիվ անձինք են ականատես եղել:

Այժմ կա հարուցված քրեական գործ՝ սակայն ոչ թե ԱԱԾ-ականների գործողությունների փաստով, այլ նրանցից մեկի նկատմամբ բռնություն գործադրելու հատկանիշներով (ՀՀ ՔՕ 316 հոդվածի 2-րդ մաս. պատժվում է ազատազրկմամբ՝ 5-10 տարի ժամկետով): Նա կալանավորվել է:

Թե ինչն է եղել սահմանապահների և նրանց միջև տեղի ունեցած վիճաբանության և ծեծկռտուքի պատճառը, դեռ պարզ չէ»:

Մանրամասները՝ թերթի այսօրվա համարում