Առաջարկվում է տարկետման իրավունքի տրամադրման ճկուն քաղաքականություն

Ուսանողներն առաջարկում են տարկետման իրավունքի տրամադրման ճկուն քաղաքականություն:

Խորհրդարանում այսօր կազմակերպված կլոր-սեղան քննարկման ժամանակ «Հանուն գիտության զարգացման» նախաձեռնության անդամները նկատեցին, որ իրենց առաջարկներում հաշվի են առել գիտնականների, դասախոսների և մասնագետների կարծիքները:

«Հանուն գիտության զարգացման» նախաձեռնության անդամ Դավիթ Պետրոսյանը հանդիպումից հետո լրագրողների հետ զրույցում նշեց, որ առաջարկ է եղել բակալավրի  չորս տարվա վրա բաշխել մեկուկես տարվա ծառայությունը:

«Սա հնարավորություն է տալիս բանակը բերել բուհ, ոչ թե բուհը տանել բանակ, 2-2 ամիս ծառայությունը բանակում հնարավորություն է տալիս չխախտել ուսանողի կրթության անընդհատությունը, պահպանվում է կապը բանակի հետ»,-ասաց նա՝ հավելելով, որ դրանով նաև կլուծվի այն շահարկման հարցը, թե մեկը ծառայած է, մյուսը` ոչ:

Դավիթ Պետրոսյանը նշեց նաև, որ քննարկումները լինելու են շարունակական, իսկ իրենց առաջարկների առաջնահերթությունները կորոշվեն, և ԿԳՆ տարկետման տեղեր կնշանակի՝ հաշվի առնելով նաև բանակի կարիքները:

ԱԺ փոխխոսնակ Էդուարդ Շարմազանովն էլ տեղեկացրեց, որ առաջարկվում է նաև ՊՆ, ԿԳՆ նախաձեռնության մասնակցությամբ կազմել աշխատանքային խումբ, որը սկզբունք առ սկզբունք, դետալ առ դետալ կքննարկի առաջարկությունները:

«Սա արվում է կառավարության որոշումներով և ենթաօրենսդրական ակտերով այս հարցերին լուծում տալու և կոնսենսուսի հասնելու համար: Ամենակարևոր քայլը, ես կարծում եմ, մեզ մոտ ստացվում է»,- ասաց Շարմազանովը: