Լավրովը հստակ մեսիջ հղեց Ադրբեջանին՝ ԼՂ կարգավորման 3 սկզբունքը պետք է դիտարկել մեկ փաթեթի մեջ. Շարմազանով

Հայ-ռուսական հարաբերությունները դաշնակցային հարաբերություններ են, որոնք ունեն բարձր փոխադարձ վստահություն և մեծ հեռանկար:

Այս մասին այսօր ՀՀԿ գործադիր մարմնի նիստից հետո լրագրողների հետ զրույցում ասաց ԱԺ փոփնախագահ, ՀՀԿ խոսնակ Էդուարդ Շարմազանովը:

Այս առումով նա նաև բարձր ու դրական է գնահատում ՌԴ արտաքին գործերի նախարար Սերգեյ Լավրովի այցը Հայաստան:

«Նախ այդ այցը կապված է Հայաստանի Հանրապետության և Ռուսաստանի Դաշնության միջև դիվանագիտական հարաբերությունների հաստատման 25-ամյակի հետ: Կարծում եմ, որ այսօր Երևանում ևս մեկ անգամ՝ թե ՀՀ նախագահը, թե ՀՀ և ՌԴ արտգործնախարարները վերահաստատեցին, որ մեր հարաբերությունները դինամիկ զարգանում են»,- ասաց ՀՀԿ խոսնակը:

Ինչ վերաբերում է Լավրովի հայտարարությանը, որ ԼՂ հարցի կարգավորման փաթեթային տարբերակն է դրված, Շարմազանովը նկատեց, որ խոսքը 3 սկզբունքների մասին է:

«Սա ազդակ է Ադրբեջանին, որը տարիներ շարունակել արհամարհելով ԵԱՀԿ Մինսկի խմբի հինգ հայտարարությունները, որ բոլոր երեք սկզբունքներն էլ հավասարազոր են և այս կամ այն սկզբունքն առանձնացնել պետք չէ։ Մինչդեռ Ադրբեջանը նշում է տարածքային ամբողջականության շրջանակներում հարցի լուծման մասին՝ արհամարհելով ինքնորոշման և ուժի կիրառման անթույլատրելիության սկզբունքը: ՌԴ ԱԳ նախարար Լավրովը հստակ մեսիջ ուղղեց, որ երեք սկզբունքները պետք է դիտարկել մեկ փաթեթի մեջ, որ ինքնորոշման իրավունքն անքակտելի սկզբունքն է, այսինքն՝ առանց Արցախի ժողովրդի կամարտահայտության խնդրի լուծում չի կարող լինել»,-ասաց նա՝ հավելելով, որ Լավրովը շատ հստակ մեսիջ հղեց Ադրբեջանին, որ Լեռնային Ղարաբաղի կարգավորման երեք սկզբունքները պետք է դիտարկել մեկ փաթեթի մեջ:

Ըստ Շարմազանովի` Լավրովը որևէ հայտարարություն չի արել, որը հակասում է խաղաղ բանակցության տրամաբանությանն ու սկզբունքներին:

Ավելին, Լավրովը նշել է, որ չնայած ռուս-ամերիկան որոշ հարցերում ոչ հարթ դիրքորոշումներին, ղարաբաղյան հարցն այն հարցն է, որ ունի, ընդհանուր առմամբ նույն դիրքորոշումը, ինչը ԱԺ փոխխոսնակի գնահատմամբ՝ շատ կարևոր է:

«Բոլոր այն հեքիաթները, որ մինչ այդ գրում էր ադրբեջանական մամուլը, հօդս ցնդեցին, ասվեց այն, ինչ արձանագրված էր փաստաթղթերում»,-ասաց նա:

Շարմազանովի խոսքով՝  այս հարցում պետք է իրատես լինել ու գիտակցել, որ այս խնդիրը չի կարող շուտափույթ լուծում ունենալ, քանի դեռ Ադրբեջանը չի վերադարձել  կառուցողական դաշտ: