Վարչապետն ու Ծառուկյանը Լուկաշենկո են խաղացնում

«Ծառուկյան» դաշինքի առաջնորդ Գագիկ Ծառուկյանը շատ մոտ հարաբերություններ ունի Բելառուսի նախագահ Ալեքսանդր Լուկաշենկոյի հետ՝ հաճախ են այցելում միմյանց, բիզնեսներ ունեն, ՀՀ-ում բելառուսական ապրանքների խանութ-սրահ կա, մեխանիզացիա և այլն:

Այսօր Հայաստանում էր Բելառուսի Ազգային ժողովի Ներկայացուցիչների պալատի նախագահի տեղակալ, միջխորհրդարանական հանձնաժողովի համանախագահ Բոլեսլավ Պիրշտուկի գլխավորած պատվիրակությանը: Վարչապետն ընդունել է պատվիրակության անդամներին:

Նա նշել է, որ երկկողմ առևտրաշրջանառության մակարդակը գտնվում է ցածր մակարդակի վրա, և երկու երկրների կառավարություններն այժմ քննարկում են կոնկրետ քայլեր ու նախագծեր, որոնք նոր թափ կհաղորդեն հայ-բելառուսական տնտեսական կապերին:

Վարչապետը նաև կարևորել է բելառուսական կապիտալի ներգրավումը ՀՀ տնտեսության մեջ:

Բոլեսլավ Պիրշտուկն իր հերթին կարևորել է տնտեսական կապերի խթանումը և այդ առումով անհրաժեշտ համարել երկկողմ ուղիղ ավիաչվերթների կազմակերպումն ու համատեղ ձեռնարկությունների ստեղծումը:

Իհարկե, բելառուսական կողմը չի նշել, թե ավիաչվերթների կազմակերպումը պետք է Գագիկ Ծառուկյանի հետ առևտուրը կարգավորելո՞ւ, թե՞ ՀՀ-ի հետ առևտուրը կարգավորելու համար:

Չմոռանանք, որ «Ծառուկյան» դաշինքը լծվել է վարչապետին վարկաբեկելու գործին. ամեն կերպ հարձակվում էին կառավարության ներկայացրած բյուջեի վրա և ընկած էին հատկապես ՊԵԿ նախագահ Վարդան Հարությունյանի հետևից, ով համարձակվել էր ստուգումներ անցկացնել «Առինջ մոլում»:

Վարչապետը փոխարենը պատրաստվել է հակահարված տալ՝ խարխլելով Լուկաշենկոյի հետ Ծառուկյանի հարաբերությունները. բելառուսական տնտեսական ներուժն ուղղել այլ ոլորտներ ու Ծառուկյանի և Լուկաշենկոյի՝ նաև տնտեսական հարաբերությունները խաթարել:

Բոլորին է հայտնի, որ Լուկաշենկոն Ադրբեջանի հետ ավելի ջերմ հարաբերություններ ունի և պատեհ-անպատեհ աջակցում է նրան, իսկ ՀՀ-ում նրան կապում է Ծառուկյանի հետ տնտեսական շահերը:

Կկարողանա՞ վարչապետը բելառուսական կապիտալը քաշել իր կողմ՝ կկարողանա լծակներ ունենալ իր ընկեր Ծառուկյանի դեմ: Ամեն դեպքում վարչապետը փորձում է:

Եթե վարչապետի վրա Ծառուկյանը հարձակվում է միջնորդների միջոցով, ապա Կարեն Կարապետյանը նույնն անում է՝ թիկունքից: