Հավերժ երիտասարդ Պարույր Հայրիկյանը

Տարիների հեռվից և օրերի կողքին հետաքրքիր է Պարույր Հայրիկյան ֆենոմենը: Նա միշտ հայտնվում է անհարմար տեղում և ամենաանհարմար ժամանակ:

Քաղաքականությունը երբեմն-երբեմն մոռանում է նրան, և մեկ էլ հոպ՝ հայտնվում է Հայրիկյանը՝ քաղաքականության դրոշը ձեռքին:

Այս անգամ էլ, չգիտես` որտեղից, Հայրիկյանը կրկին հայտնվել է` այս անգամ հացադուլ է անում Կենտրոնական ընտրական հանձնաժողովի առջև:

Ի դեպ, վերջերս ուսանողները հացադուլ էին անում՝ պահանջելով տարկետման իրենց իրավունքը, երբեմն բանտարկյալներն են հացադուլ անում՝ պահանջելով իրենց ոտնահարված իրավունքների վերականգնում, իսկ Պարույր Հայրիկյանը հանկարծ հիշել է, որ ՀՀ սահմանադրությունն օրենքով վերապահված է իրեն և այս անգամ որոշել է պահանջել Սահմանադրության իր իրավունքը՝ հացադուլի միջոցով:

Հայրիկյանն, այս անգամ ԿԸՀ-ից, պահանջում է, որ ԿԸՀ-ն իրեն տրամադրի սահմանադրական հանրաքվե անցկացնելու համար անհրաժեշտ ձևաթուղթը, որով կկարողանա հավաքել 200 հազար քաղաքացու ստորագրություն և կնախաձեռնի հանրաքվեն:

ԿԸՀ նախագահ Տիգրան Մուկուչյանն էլ ասել է, որ պատասխանել են Պարույր Հայրիկյանի գրությանը և նշել, որ 200 հազար քաղաքացու ստորագրությամբ հանրաքվե կազմակերպելու սահմանադրական դրույթն ուժի մեջ է մտնում 2018 թվականին:

Հայտնի չէ՝ Պարույր Հայրիկյանը տեղյա՞կ է, որ կարող է միայն 2018 թվականին օգտվել սահմանադրական իր իրավունքից, թե՞ ոչ, սակայն նա արդեն 2017-ից սկսել է հացադուլ անելը, և դա այժմ այնքան մոդայիկ է երիտասարդների շրջանում: Ի՞նչ խոսք, Հայրիկյանը ևս հավերժ երիտասարդական ավյունով է երբեմն-երբեմն հայտնվում քաղաքականությունում՝ այս անգամ թեկուզև սովահարությամբ:

Խնդիրն այն է, որ Տիգրան Մուկուչյանը, թեև բազում-բազմաթիվ մեղքեր ունի, սակայն որոշված է՝ սահմանադրական փոփոխություններն ուժի մեջ են 2018-ից, իսկ մինչ այդ ուժի մեջ է 2005-ի Սահմանադրությունը: Իսկ թե Հայրիկյանն իր սովահարությամբ ինչպես է փոխելու սահմանադրական իրերի ընթացքը՝ պարզ կլինի մի քանի օրից:

Քանի որ հազիվ թե մի քանի օրում՝ ի սեր Հայրիկյանի սահմանադրական փոփոխությունները մտնեն ուժի մեջ, ինչ է թե Հայրիկյանը հացադուլ է անում, հավանական է, որ Հայրիկյանը կգնա տուն՝ հաց ուտելու:

Սակայն էական է մեկ հանգամանք, որ ՀՀ քաղաքականությունը, Հայրիկյանի բոցկլտյունների շնորհիվ, ձեռք է բերում գույն ու կոլորիտ, նաև քաղաքական անբարեպատեհություն, թեև ժամանակավոր:

NEWSPRESS.am