Վահրամ Բաղդասարյանի կտրող սուրը վերածվել է ՀՀԿ-ի պաշտպանական վահանի

ԱԺ ՀՀԿ խմբակցության ղեկավար Վահրամ Բաղդասարյանը նորմալ է որակում այն փաստը, որ Հայաստանում կան աղքատներ և հարուստներ, որ աղքատներն օրվա հացի կարոտ են, իսկ հարուստները դղյակներ են կառուցում…

«Բոլորիս ցանկությունն է, որ Հայաստանում շատ կառուցվեն, շատ դղյակներ լինեն… ամբողջ աշխարհում չի կարող հավասար դաշտ լինել բոլորի համար, կան հարուստներ և աղքատներ… նախ պետք է ուսումնասիրվի այդ հարուստների հարստացման ճանապարհը»:

Իհարկե, ամբողջ աշխարհում հավասար դաշտ լինել չի կարող: Այստեղ խնդիրն ավելի շատ այն է, որ այս հայտարարությունն անում է մի մարդ, ով մինչև իշխող կուսակցության անդամ դառնալը, այսինքն՝ մինչև 2007 թվականը, Ազգային ժողովում ինքն էր քարկոծում անհավասարությունն ու արտագաղթը և աչքի էր ընկնում իր ընդդդիմադիր հայացքներով:

Նրան բոլորը հարգում էին՝ նրա դիպուկ և ընդդիմադիր ելույթների և գործունեության համար: Ի՞նչ եղավ 2007 թվականին: Անկախ պատգամավորը ԱԺ չմտավ՝ չընտրվեց:

Ու որոշեց ԱԺ մտնելու համար՝ անդամակցել ՀՀԿ-ին: Վահրամ Բաղդասարյանը 2011 թվականից դարձել է ՀՀԿ անդամ:

Մինչև 2012-ի ԱԺ ընտրությունները նա հայտարարում էր, թե.

«Չեմ ասում, որ գնալով ՀՀԿ, պետք է իմ բոլոր սկզբունքներից հրաժարվեմ, այն ամեն ինչից, որը որ դեմ եմ եղել իրենց գործունեությանը, պետք է հրաժարվեմ և խոնարհ ենթարկվեմ բոլոր որոշումներին»:

Իսկ 2012 թ. ՀՀԿ համամասնական ցուցակով ԱԺ պատգամավոր դառնալուց հետո, նա այնպես հրաժարվեց իր սկզբունքներից, որ Հանրապետականը փոխհատուցեց դա. 2014-ին էլ Բաղդասարյանը դարձավ ո՛չ ավել, ո՛չ պակաս ԱԺ ՀՀԿ խմբակցության ղեկավար:

Այսքանից հետո Վահրամ Բաղդասարյանը հայտարարում է, թե.

«16 տարեկանից աշխատել եմ, նախքան քաղաքականություն մտնելը, եղել եմ բիզնեսների մեջ ու ամեն ինչի իմ ուժերով եմ հասել»:

Իհարկե, այս պահին ոչ ոք չի պատրաստվում քննարկել Վահրամ Բաղդասարյանի անցած ճանապարհը կամ հերքել նրա հայտարարությունները: Պարզապես հարկ է, ինչպես ինքն է ասում, ուսումնասիրել, թե կոնկրետ ինչ ճանապարհով է անցել Վահրամ Բաղդասարյանի բիզնեսն, ու այս ի՞նչ ուժերով է նա դարձել իշխող կուսակցության ծանրակշիռ դեմքերից մեկը:

Եթե դա իրոք սեփական քրտինքի ու ջանքերի արդյունքն է, ապա Բաղդասարյանը շատ շուտ է մոռացել իր անցած ճանապարհը՝ այն աստիճան, որ ԱԺ-ում հնչած նրա սուր ելույթներն այսօր վերածվել են ՀՀԿ-ի պաշտպանական ճառերի: Կամ, այլ բնութագրամամբ, Վահրամ Բաղդասարյանի կտրող սուրը վերածվել է ՀՀԿ-ի պաշտպանական վահանի:

Արմինե Մկրտումյան