Ռուսաստանում հակահայկական տրամադրություններ են ստեղծում. «Մի՞թե Հանրապետականը պատրաստվում է Հայաստանը տանել Ուկրաինայի ճանապարհով» (վիդեո)

Ռուսական «Զվեզդա» հեռուստաալիքի «Прогнозы» հաղորդաշարի ընթացքում վարող, պատմաբան Վերոնիկա Կրաշենիննիկովան անդրադարձ է կատարել Հայաստանի և ԵՄ-ի միջև ստորագրվելիք համաձայնագրին:

Նա նախ հռետորական հարց է տվել հեռուստադիտողին. «…Իսկ այդ ընթացքում Եվրոպական միություն պատրաստվում է մտնել… ո՞վ՝ դուք մտածեցիք: Միանգամայն անսպասելի պատասխան՝ Հայաստանը: Այո, այո, այն երկիրը, որը հանդիսանում է Եվրասիական տնտեսական միության անդամ, ՀԱՊԿ անդամ, Անդրկովկասում մեր գլխավոր գործընկերը»:

Այս հարցում Կրաշենիննիկովան Հայաստանը համեմատել է Ուկրաինայի հետ: Դրանից բացի, իբրև օրինակ այն բանի, թե Հայաստանն իր գործելաոճով «հետևում է» Ուկրաինային, նա բերում է Նժդեհի արձանը Երևանում տեղադրելու փաստը՝ ուշադրություն, Նժդեհին մեղադրելով ֆաշիզմի մեջ:

«Դժվար է հավատալ, բայց Երևանը ևս հերոսացնում է ֆաշիզմի մեղավորներից մեկին: 2016թ. մայիսին Երևանում տեղադրվել է Գարեգին Նժդեհի արձանը»,- ասում է Կրաշենիննիկովան:

Նա մեջբերել է Նժդեհի խոսքերն ու եզրակացրել. «Այս արձանը խորին վիրավորանք է հայ ժողովրդի նկատմամբ, ովքեր քաջաբար կռվել են Հայրենական մեծ պատերազմում: 106 հայ Խորհրդային միության հերոս է»:

Վերջում նա նաև անդրադարձ է կատարել Հանրապետական կուսակցությանը, դրա լոգոտիպին. «Մի՞թե Հանրապետականը պատրաստվում է Հայաստանը տանել Ուկրաինայի ճանապարհով»,- հարցով եզրափակել է նա:

Անհասկանալի է մնում միայն մի բան, թե ինչո՞ւ է ՌԴ ՊՆ վերահսկողությամբ աշխատող հեռուստաալիքը միայն 1.5 տարի հետո «հիշում» Նժդեհի արձանի տեղադրման մասին, այն ժամանակ, երբ Հայաստանը պատրաստվում է ամրացնել կապերը ԵՄ-ի հետ: