Շատ սխալ քայլ է. հոգեբանը՝ մանկատների փակման մասին

Հոգեբան Կարինե Նալչաջյանն այդքան էլ լավ չի պատկերացնում կառավարության՝ մանկատների փակման հետ կապված որոշումն ու դրա հետևանքները: Նրա գնահատմամբ՝ մի կողմից լավ է, որ Հայաստանում, այլ երկրների համեմատ մանկատներն ավելի քիչ են, մյուս կողմից, հոգեբանի կարծիքով, բոլոր մանկատները վերջնականապես փակել չի կարելի:

«Հարց է առաջանում, թե որտե՞ղ են մնալու այդ երեխաները»,- NEWSPRESS.am-ի հետ զրույցում իր մտահոգությունը հայտնեց հոգեբանը:

Նրա դիտարկմամբ՝ երեխայի համար անփոխարինելի է ընտանիքը, ծնողների առկայությունը, քանի որ մանկատան երեխաներն արդեն իսկ ունեն որոշակի հոգեբանական զրկվածություններ, որոնք որևէ բանով չի կարելի փոխարինել։ Եվ պատահական չէ, որ մանկատներում մեծացած երեխաները հոգեբանորեն ճնշված մարդիկ են մեծանում։

Այդուհանդերձ, հարց է առաջանում, թե ինչ ճակատագիր է սպասվում այդ երեխաներին՝ ոչ կենսաբանական ընտանիքում: Ըստ Կարինե Նալչաջյանի՝ եթե մանկատունը փոխարինվի հոգատար ընտանեկան օջախով, ապա դա դրական փոփոխություն կարելի է համարել։ Սակայն չի բացառվում, որ լինի նաև հակառակ պատկերը:

«Իհարկե վատ է, եթե այդ երեխաներն աչքաթող արվեն. դա շատ կարճատես մոտեցում է, շատ սխալ քայլ։ Եթե առաջարկվեն այլընտրանքային տարբերակներ, ապա պետք է հասկանալ՝ արդյո՞ք այդ տարբերակները հոգեբանական տեսակետից ավելի նպաստավոր են երեխայի զարգացման համար, թե՞ ոչ»,-ասում է մեր զրուցակիցը։

Արձագանքելով դիտարկմանը, թե ոչ բոլոր ընտանիքներն են ապահով և հետևաբար երեխայի կարիքները բոլոր ընտանիքները չէ, որ կարող են հոգալ, հոգեբանը նկատեց, որ լիարժեք փոխարինում հնարավոր չէ։

«Եթե ստեղծվեն այդ ընտանեկան օջախները, ապա դրանք ինչ-որ չափով ավելի բարեկեցիկ են երեխայի զարգացման համար, սակայն լիարժեք փոխարինել ծնողական սիրուն կամ միջավայրին հնարավոր չէ»,-ընդգծեց Կարինե Նալչաջյանը:

Զրուցեց Հասմիկ Գասպարյանը