«Էկո-Մեդիա ցանցի» լրագրողները խաղաղության ծառատունկ արեցին սահմանամերձ Բերդում

Լուսանկարները՝  Tert.am-ի

«Էկո-Մեդիա ցանցի» լրագրողները Բնապահպանության նախարարության աջակցությամբ ճանաչողական այցով Տավուշի մարզում էին, որտեղ ծանոթացան թե′ Իջևանի «Կանաչ սիմֆոնիա», թե′ Բերդի «Սորաններ» դենդրոպարկերին:

Բերդ քաղաքի «Սորաններ» դենդրոպարկը Բնապահպանության նախարարության արգելոցապարկային համալիր ՊՈԱԿ-ի ենյության ներքո գտնվող չորս դենդրոպարկերից մեկն է: Ծառայգու տարածքը 62 հա է, 161 ծառաթփատեսակներ կան, հիմնադրվել է 1962 թվականին` Հրանտ Ավագյանի կողմից:

Դենդրոպարկի հարակից տարածքում է գտնվում Ցլիկ Ամրամի բերդը, որը հիշեցնում է ուղղաձիգ ժայռ, պեղումներ չեն իրականացվել, և ամրոցի  մուտքերն ու ելքերը փակված են:

«Սորաններ» դենդրոպարկի նորանշանակ տնօրեն Դավիթ Աթոյանը նշեց, որ տարածքում տուրիզմը զարգացնելու նպատակով նախատեսվում է զիփլայն կառուցել դենդրոպարկի տարածքից: Ամռանն, ըստ նրա, շատ զբոսաշրջաիկներ են գալիս դենդրոպարկ, այստեղ է անցկացվում նաև Հատապտուղների և մեղրի փառատոնը, որը ևս տուրիզմ զարգացնելու համար կարևոր խթան է:

Տնօրենը կարևորեց դենդրոպարկի ցանկապատի հարցը, դենդրոպարկի տարածքում ամբողջական ոռոգման խնդիր կա՝ մասամբ ունեն, իսկ այս տարվա չոր եղանակն, ըստ նրա, շատ վնասներ է հասցրել այգուն, սակայն տուրիզմը մնում է դենդրոպարկի գլխավոր հարցը:

«Եկող տարի փայտից տաղավարներ կտեղադրվեն, հանգստի գոտի կդարձնենք: Դենդրոպարկն արդեն տարիների կուտակված աղբից ենք մաքրել և այգի մուտք գործող երկրորդական մեքենաների ճանապարհներն արգելափակել ենք»,- ասում է Դավիթ Աթոյանը:

Էկո-լրագրողները ճանաչողական այցի ժամանակ խաղաղության ծառատունկ իրականացրին «Սորաններ» դենդրոպարկում, խոստացան վերադառնալ և հաջորդ տարի տեսնել, թե ինչպես են աճել նորատունկ տուաները:

Ի դեպ, դենդրոպարկը հարուստ է պատմական հուշարձաններով, այստեղ է գտնվում մարշալ Հովհաննես Բաղրամյանի՝ 1976թվականին տնկած ծառը, այգու տարածքում ժայռի վրա ցույց են տալիս նախամարդու հետքը՝ հենց ժայռերի վրա, այգում կան հուշարձաններ, որոնք պահպանվել են դեռևս խորհրդային շրջանից, իսկ ամենաազդեցիկը՝ դենդրոպարկից հրաշալի տեսարան է բացվում Բերդ սահմանային քաղաքի վրա՝ հատկապես գիշերը, երբ սահմանային քաղաքը լույսերի մեջ է:

Տավուշի մարզում էկո-լրագրողներն այցելեցին նաև Իջևան քաղաքի դենդրոպարկ:

Նշենք, որ դենդրոպարկը հիմնադրվել է 1962 թ., այն հիմնադրել է պարկի ներկայիս տնօրեն Մեխակ Սայադյանի հայրը՝ Լյուդվիգ Սայադյանը: Իջևանի դենդրոպարկում առկա է 600-ից ավելի ծառաթփատեսակ, տարածքը 15 հա է:

Այստեղ կարող են ծառ գնել և անվանական ծառատունկ կատարել՝ ի հիշատակ դենդրոպարկ այցելության:
Չորային կլիման Իջևանի դենդրոպարկին ևս վնասներ է հասցրել, ծառեր են չորացել:

Այգու «հերոսը» սեկվոյաներն են, որոնց բները մշտական հարվածներից պոկվել են. կեղևը փափուկ է, և այցելուներն իրենց ուժն են փորձում կեղևի վրա: Տնօրեն Մեխակ Սայադյանը որոշել է ցանկապատել սեկվոյայի շուրջը:

Այստեղ է գտնվում արջատխլենու միակ ծառուղին. այն տնկվել է պատահաբար, հետո պարզել են, որ աշխարհում որևէ տեղ արջատխլենու նման ծառուղի չկա: Դենդրոպարկի մուտքն ազատ է:

Երկու դենդրոպարկերը հայոց բնության հրաշք անկյուններ են՝ Հայաստանը և հայկական բնաշխարհը բացահայտելու եզակի հնարավորություն:

NEWSPRESS.am