Նպաստներն ու թոշակները չեն բարձրանա, քանի որ կառավարությունը չի ուզում մարդկանց շոկի մեջ գցել

Մինչ ԱԺ-ի դիմաց ուսանողները բոյկոտում են քիչ առաջ խորհրդարանի կողմից ընդունված օրենքը, պատգամավորները բնականոն հունով շարունակում են իրենց աշխատանքը. ԱԺ-ում քննարկվում է 2018 թվականի բյուջեն:

Չի բացառվում, որ այս քննարկման արդյունքները ևս չգոհացնեն հասարակությանը, քանի որ եկող տարվա բյուջեն թոշակների, նպաստների և նվազագույն աշխատավարձի ավելացում չի նախատեսում:
Բացի այդ, կրճատվել են առողջապահական, կրթական և սոցիալական ոլորտներին ուղղված ծախսերը:

Միևնույն ժամանակ, դրան զուգահեռ աճելու է արտաքին պարտքը:

Բյուջեի քննարկման ժամանակ «Ելք» ընդդիմադիր խմբակցության ղեկավար Նիկոլ Փաշինյանը նկատեց, որ արտաքին նոր պարտքը լինելու է ճիշտ այնքան, որքան մինչ այժմ վերցրած պարտքերն են:

«Սա նշանակում, որ աղքատներն ավելի են աղքատանալու, մարդիկ առնվազն 10 տոկոսով ավելի վատ են ապրելու հաջորդ տարի»,- ասաց Փաշինյանը:

Զեկուցող Ֆինանսների նախարար Վարդան Արամյանը, ի պատասխան Փաշինյանի, նշեց, որ այդկերպ մտածել են նաև եկող տարիների մասին ևս՝ տեսադաշտում ունենալով 3-5 տարի: Ինչ վերաբերում է այն բանին, որ թոշակները, աշխատավարձերն ու ու նպաստները չեն ավելանում, ապա նա նկատեց, որ նախորդ տարիներին արդեն բարձրացրել են:

«Պետք է մի փոքր դադար տանք, որ այդ բարձրացումները մարսենք, որովհետև դա համընկել է 2014-2016 թվականների շոկերի հետ: Որպեսզի այդ շոկերից դու դուրս գաս, պետք է տնտեսությունդ աճի… կառավարության նպատակը հետևյալն է՝ պետք է պայմաններ ստեղծել, որ ոչ թե նպաստ ու թոշակ բարձրացվի, այլ մարդկանց աշխատելու հնարավորություն տրվի»,- ասաց Վարդան Արամյանը:

Ի պատասխան նրա՝ Նիկոլ Փաշինյանն արձանագրեց. «Ձեր ասածից դուրս եկավ, որ մենք նախորդ տարիներին էնքան բան ենք արել, որ հեղեղել ենք մեր հանրությանն ապահովության գործիքներով, որ հիմա պետք է թողենք՝ մի քիչ հետ գա»: