Հացադուլ հայտարարած ուսանողի ինքնազգացողությունն արդեն լավ է. ակցիայի մասնակիցները շարժվում են դեպի ԱԺ

Երեկ երեկոյան հացադուլ հայտարարած ուսանողներից մեկի՝ Լևոնի ինքնազգացողությունը վատացել է: NEWSPRESS.am–ի տեղեկություններով՝ նրա ուսանող ընկերներն անմիջապես շտապօգնություն են կանչել:

Ժամանած բժիշկը նկատել է, որ տղայի մոտ թերսնում է: Նա ուսանողին հորդորել է չշարունակել բոյկոտը և անհապաղ անցնել սովորական կյանքի ռիթմին: Հացադուլ հայտարարած մյուս ուսանողները ևս միացել են բժշկի հորդորին: Հատկապես երբ ըստ նրանց նախնական պայմանավորվածությամբ՝ նա, ով ֆիզիկապես և առողջապես չի կարող շարունակել հացադուլը, կարող է դուրս գալ բոյկոտից:

Երիտասարդին տեղափոխել են տուն, որտեղ նա կստանա համապատասխան օգնություն: Իսկ մյուս տղաները շարունակել են բոյկոտը: Մեր տեղեկություններով՝ նրա վիճակն այժմ ավելի լավ է:

Նկատենք, որ մինչ այդ, տղաներին հացադուլից դուրս գալու հորդորով դիմել էր նաև  «Ելք» խմբակցության անդամ Արամ Սարգսյանը: «Եթե հացադուլով այդ խնդիրը լուծվեր, ես էլ հացադուլ կանեի, բայց հանրապետական մեծամասնությունը տենց բաների չի նայում»,- ասել է նա՝ միաժամանակ ոգևորելով տղաներին նախաձեռնության՝ օրենքին դեմ դուրս գալու և ակցիաներ կազմակերպելու համար: Ուսանողներն այս պահին շարունակում են շրջել բուհերով և ուսանողներին իրենց միանալու կոչեր անել: Նրանք պատրաստվում են գնալ ԱԺ՝ «Հանուն գիտության…» կոչերով:

Հիշեցնենք, որ Հայաստանի մի շարք բուհերի ուսանողներ ավելի քան մեկ շաբաթ դասադուլ են հայտարարել: Նրանք բողոքում են տարկետման իրավունքի սահմանափակման դեմ, որը նախատեսվում է «Զինվորական ծառայության ու զինծառայողի կարգավիճակի մասին» օրինագծով: Իսկ ուսանողներից մի քանիսը, որպես բողոքի նշան, հացադուլ էին հայտարարել:

Ազգային ժողովն ընդունել է նախագիծն առաջին ընթերցմամբ: Երկրորդ ընթերցմամբ քվեարկությունը նախատեսված է այսօր: