Դասադուլի մասնակից ուսանողները խիստ կպատժվեն. դասախոսները սպառնացել են

Արդեն մեկ շաբաթ է՝ ուսանողները շարունակում են դասադուլները և բողոքի ակցիաներն ընդդեմ «Զինվորական ծառայության մասին» նոր օրենքի, որով սահմանափակվում է տարկետման իրավունքը։

Այսօր էլ նրանք հավաքվել են Կոմիտասի անվան կոնսերվատորիայի դիմաց՝ ֆրանսիական պուրակում:

Նախաձեռնող խմբի անդամները բարձրախոսով կոչ են անում բոլորին միանալ իրենց ակցիաներին և պարզաբանում են, թե ինչ բացասական ազդեցություն կարող է ունենալ օրենքի փոփոխությունը:

Հիշեցնենք, որ մինչ օրս ուսանողներին ընդունել են Կրթության և գիտության նախարար Լևոն Մկրտչյանը և երկրի վարչապետ Կարեն Կարապետյանը: Նրանց հետ, սակայն, ուսանողները համաձայնության չեն եկել: Ավելի ուշ, նրանց խոստացել էին ընդունել Ազգային ժողովի պատգամավորները՝ մասնակցելու «Զինվորական ծառայության մասին» նոր օրենքի քննարկմանը, սակայն նիստը հետաձգվել էր:

Ուսանողները NEWSPRESS.am-ի հետ զրույցում այս առթիվ նկատեցին, որ պատգամավորներն իրենց խաբել են: Ուսանողները հենց այդ երեկո ընդունարանից փորձել են կապ հաստատել որևէ խմբակցության պատգամավորներից մեկի հետ, սակայն դա նրանց այդպես էլ չի հաջողվել:

Այժմ ուսանողները շարունակում են ցույցերը:

Հարկ է նկատել նաև, որ նախաձեռնող խումբը բացել է ֆեյսբուքյան էջ, որի միջոցով հանրությանն իրազեկում է իրենց գործողությունների մասին: Սակայն պետք է նկատել նաև, որ օգտատերերի զգալի մասը նախաձեռնությունը գրկաբաց չի ընդունում: Քաղաքացիներից շատերի կարծիքով՝ այս ակցիան ևս կահամալրի այն տապալված ցույցերի շարքը, որոնք կազմակերպվել էին սոցիալական խնդիրները վեր հանելու և լուծում տալու համար:

Որպես այդպիսիք՝ մատնանշվում են «Էլեկտրիկ Երևանը», «Սասնա ծռերը» և տրանսպորտի թանկացման դեմ ակցիան:

Լինա Կասյանն, օրինակ, գրել է.

«Ուսանողների ակցիան կարժևորվեր և հարգանքի կարժանանար, եթե մեր իրականության մեջ իշխանության, կառավարության կողմից թույլ տրված ցանկացած անարդար մոտեցում ևս ուսանողների կողմից համանման ուշադրության և համախմբվածության արժանանար»:

Շուշան Ղազարյանն էլ գրառել է.

«Եթե ժամանակին միանայիք Ծռերի ցույցերին, էս օրը չէիք ընկնի։ Բանակի վախից դուրս եք եկել, «հերոսներ»»:

Համենայն դեպս, ուսանողներն իրենք մարտական են տրամադրված և մտադիր են ավարտին հասցնել սկսած գործը և պայքարը տանել մինչև վերջ՝ հասնելով հանգուցալուծման (այսինքն՝ հասնել այն բանին, որ օրենքը չընդունվի-հեղ.): Բացի սկզբունքայնությունից, այսօր սկսած գործն ավարտին հասցնելու այլ շարժառիթ ևս կա: Ուսանողները հետքայլ այլևս չեն կարող անել, թեկուզ և հենց այն պարզ պատճառով, որ որոշ ֆակուլտետների դեկաններ ուսանողներին սպառնացել են կտրել թոշակից և կիրառել համապատասխան այլ պատիժներ՝ ընդհուպ մինչև հեռացում՝ ցույցերին մասնակցելու համար:

Թո կոնկրետ ովքեր են այդ դասախոսները, ուսանողները NEWSPRESS.am-ի հետ խոսելիս անուններ չտվեցին, միայն նկատեցին, որ ամեն դեպքում պետք է ակցիան հասցնել նպատակակետին:

Ամեն դեպքում կան նաև կարծիքներ, որ ուսանողների ակցիան ինքնաբուխ է և արժանի է հարգանքի: Մարինե Բաշյանն, օրինակ, այս առթիվ գրել է, որ ուսանողների պայքարն արդար է և տեղին:

«Կեցցե՛ք, ու գնացե՛ք մինչև վերջ: Իսկ Կառավարությանը թող չհուզի մասնակից ուսանողների քանակը՝ մեկընդմիշտ իմացե՛ք բոլորն էլ դեմ են այդ օրենքին»:

Արմինե Մկրտումյան