ՌԴ արտագնա աշխատանքի մեկնում են նաև սեռական հաճույքները բավարարելու համար. փորձագետ

Ռուսաստանում երեխա ունեցող ամեն երկրորդ կին ամուսին չունի, բայց ունի տղամարդու և սեռական կյանքի պահանջ: Սա սոցիոլոգ Ահարոն Ադիբեկյանի տվյալներով, ում խոսքով՝ Ռուսաստանում սեռավարակները շատ են, քան Հայաստանում: Իսկ դեպի մեր երկիր վարակը գալիս է ամենաշատը Ռուսաստանից:

Իսկ սեռավարակաբան-մաշկաբան Հովհաննես Հովհաննիսյանն էլ վստահեցնում է, որ հայ տղամարդիկ, մեկնելով Ռուսաստան արտագնա աշխատանքի՝ լրացնում են այդ պահանջը, ինչի հետևանքով Հայաստան են վերադառնում վարակված:

«Հայ տղամարդը Ռուսաստանում, աշխատանքից բացի, ունենում է նաև սեռական հարաբերություն»,-ասում է սեռավարակաբանն ու նկատում, որ իր կատարած հարցումների արդյունքում պարզել է՝ տղամարդիկ մեկնում են Ռուսասատան արտագնա աշխատանքի, քանի որ սեռական հաճույքներն այնտեղ ավելի հեշտ է բավարարել:

Մաշկաբանը նկատում է, որ իրենց համար դժվար է աշխատել աշխատանքային միգրանտների հետ, ովքեր ավելի շատ են գնում Ռուսասատան՝ հիմնականում մարզերից: Հովհաննես Հովհաննիսյանը նշում է, որ դժվար է այս խմբին բացատրել, թե ինչու պետք է պաշտպանվել սեռական հարաբերությունների ժամանակ և ինչ պետք է անել Հայաստան գալուց առաջ, ինչի հետևանքով մարզերում սեռավարակների թիվն անհամեմատ ավելին է:

«Կան մարզեր, որոնք սեռավարակների առումով առաջատար են` Շիրակի մարզը, Գեղարքունիքի մարզը։ Դա, երևի, պայմանավորված է նաև բնակչության թվաքանակով, միգրացիայի, սեռական կյանքի կուլտուրայի մակարդակով»,-ասաց Հովհաննիսյանը: