Ադրբեջանը հնարավորություն ունի ստանալ այն, ինչ ուզում է` վերահսկողության տակ առնել Արցախի ողջ տարածքը. Արման Մելիքյան

Ադրբեջանցի քաղաքագետ Էլհան Շահինօղլուն հայտարարել է, թե Ռուսաստանի նախագահ Վլադիմիր Պուտինը Թուրքիայի նախագահ Ռեջեփ Էրդողանի հետ հանդիպման նախաշեմին, առանց նախապայմանների ԼՂ-ի շրջակա 5 շր­ջաններ ազատելու համար, Ադրբեջանի առաջ երեք պայման է դրել. 1-ին՝ Ադրբեջանի անդամակցությունն է ԵԱՏՄ-ին։ 2-րդ՝ Ադրբեջանի անդամակցությունը ՀԱՊԿ-ին։ 3-րդ՝ ԼՂ-ում պիտի տեղակայվեն Ռուսաստանի խաղաղապահ ուժերը։

Թեմայի շուրջ NEWSPRESS.am-ը զրուցեց Արցախի նախկին արտգործնախարար, քաղաքան վերլուծաբան Արման Մելիքյանի հետ:

-Պարո՛ն Մելիքյան, կա՞  արդյոք  հավանականություն, որ ՌԴ նախագահ Պուտինն իսկապես նման նախապայմաններ առաջ քաշած լինի: Ի՞նչ հնարավոր զարգացումներ կարող են հետևել դրան:

-Չեմ կարծում, որ այս նախապայմանները հենց նոր են ռուսների կողմից դրվել Ալիևի առջև: Հավանաբար, դրանք ադրբեջանական կողմին ներկայացվել ու բանակցվել են առնվազն վերջին երեք-չորս տարվա ընթացքում: Արդյունքում, մոտ մեկ տարի առաջ ռուս և ազերի տարբեր պաշտոնատար անձինք ու փորձագետներ միաժամանակ սկսեցին խոսել կարգավորման՝ «տարածքներ ավելի լավ իրավիճակի դիմաց», նոր մի բանաձևի կիրառման հնարավորության մասին: Այդ բանաձևը նախատեսում է արցախյան տարածքների հանձնում, սակայն ոչ թե պաշտոնական Բաքվի կողմից արցախահայության ինքնորոշման իրավունքը ճանաչելու նախապայմանի պարտադիր կատարման, այլ տարածքների հանձնումից հետո ուրվագծված շփման գծում նոր ագրեսիվ գործողություններից զերծ մնալու խոստման դիմաց:

-Դուք տեսնո՞ւմ եք արդյոք որևէ միտում՝ կապված այս տեղեկատվության արտահոսքի հետ: Ըստ  Ձեզ՝ ո՞ւմ և ինչո՞ւ է ուղարկվել այս մեսիջը:

-Այս կարգի տեղեկատվական արտահոսքերն առևտուրը շարունակելու և ռուսներից նոր զիջումներ կորզելու համար անհրաժեշտ հոգեբանական ու քաղաքական մթնոլորտի ձևավորմանն են նպաստում: Հայաստանի դե ֆակտո իշխանությունների քաղաքական անգործունակության հետևանքով Ադրբեջանն իսկապես լավ հնարավորություն ունի ստանալ այն, ինչ ուզում է` փուլ առ փուլ իր վերահսկողության տակ առնել Արցախի ներկայիս ողջ տարածքը:

-Այս պարագայում ո՞րն է լինելու Հայաստանի դիվանագիտական քայլը:

-Այդ հարցը պետք է ՀՀ ԱԳՆ կամ Նախագահական ուղարկեք` իրենք են պատասխանատու ստեղծված իրավիճակի համար:Ամեն դեպքում այլընտրանքը կա:

Զրուցեց Արմինե Մկրտումյանը