«Միգուցե ինձ հանեն ուսխորհրդից, բայց ես շարունակելու եմ մասնակցել դասադուլին»․ ՈւԽ-ն դեռ չունի դիրքորոշում

«Ես ԵՊՀ-ի ուսանողական խորհրդից եմ, սակայն մասնակցում եմ դասադուլին, քանի որ դեմ եմ տարկետման վերացման օրինագծին ու արտահայտում եմ իմ բողոքը»։

NEWSPRESS.am-ի հետ զրույցում նշեց ԵՊՀ Հայ բանասիրության ֆակուլտետի ուսանողուհի Անի Հակոբջանյանն ու ընդգծեց, որ միգուցե իրեն հանեն ուսխորհրդից, բայց ինքը շարունակելու է մասնակցել դասադուլին։

Ուսանողներից մի քանիսն էլ նշեցին, որ ուսխորհրդից կան շատ ուսանողներ, ովքեր դեմ են տարկետման վերացման օրինագծին, սակայն երթին չեն մասնակցում, մնում են համալսարանում։

Հատկանշական է, որ վերջին օրերին մամուլում ու լրատվական կայքերում քննարկվում է ուսխորհրդի չեզոք դիրքը։ ԵՊՀ ուսխորհրդի նախագահ Արմեն Խաչիկյանը լրատվական կայքերին տված հարցազրույցներում չի ներկայացրել իր կարծիքն այս հարցի շուրջ՝ ընդգծելով, որ ՈՒԽ-ն ներկայացուցչական մարմին է, ու որպես ՈՒԽ նախագահ՝ նա չի ցանկանում անձնական կարծիքը հայտնել։

armen khachikyan

Այս ամենի հետ մեկտեղ նա ընդգծել է նաև, որ իր օրինակով կարող է ասել, որ բանակում ծառայելուց հետո էլ հնարավոր է գիտությամբ զբաղվել։

Իրականում պե՞տք է, որ ՈՒԽ-ն այս պահին լինի ուսանողի կողքին, թե՞ ոչ։ Այս հարցի պատասխանը գտնելու համար բավական է մտնել Երևանի պետական համալսարանի կայքն ու կարդալ 1994 թվականին ձևավորված ՈւԽ-ի կանոնադրության մեկ կետ, որում նշված է, թե ի՞նչ պարտականություն ունի վերոնշյալ կազմակերպությունը։

ՈւԽ նպատակն է՝

նպաստել ուսանողության համար բարենպաստ միջավայրի ձևավորմանը և խթանել ուսանողների գիտական, կրթական, հոգևոր, մշակութային, ստեղծագործական ու ֆիզիկական զարգացումը:

Այս ամենի հետ մեկտեղ պետք է նշել, որ ԵՊՀ ուսանողական խորհուրդը դեռևս չունի որևէ դիրքորոշում, իսկ պայքարի դուրս եկած ուսանողները շարունակում են վանկարկել․ «Հանուն գիտության զարգացման»։