«Ես այլևս չեմ ճանաչում Մխիթարյան անունով ֆուտբոլիստի»․ Ինչո՞ւ է անկում ապրել Հենոյի խաղը

«Միկկի՛, մի՞թե կարելի է այդքան վատ խաղալ», «Չելսիի դեմ խաղում վատագույնը Մխիթարյանն էր», «Ես այլևս չեմ ճանաչում Մխիթարյան անունով ֆուտբոլիստի»։

Սրանք այն մեկնաբանություններն են, որոնք վերջին օրերին ամենաակտուալն են դարձել անգլիական «Մանչեսթեր Յունայթեդ» ֆուտբոլային ակումբի Twitter-յան միկրոբլոգում։ Անգլիական թիմի երկրպագուները դժգոհ են հայ կիսապաշտպանի ցուցադրած խաղից։

Մրցաշրջանի սկզբում հայ կիսապաշտպանն ուղղակի փայլում էր, և մասնագետները նշում էին, որ այս տարի լինելու է Մխիթարյանի լավագույն մրցաշրջաններից մեկը, իսկ վերջին մի քանի խաղերի ժամանակ նա աննկատ է մնում խաղադաշտում։

Մասնագետներն ու վերլուծաբանները հայ կիսապաշտպանի խաղի անկումը կապում են մի շարք գործոնների հետ։ Պետք է հաշվի առնել, որ Մխիթարյանը «Մանչեսթերի» ամենաառանցքային խաղացողներից մեկն է, ով մասնակցում է թիմի հարձակվողական գործողություններին։ Ենթահարձակվողի դիրքում գտնվող ֆուտբոլիստը պետք է մտածի միայն մրցակցի դարպասը գրավելու և առաջ քաշված հարձակվողին գնդակներ մատակարարելու մասին։ Պետք է նկատել, որ վերջին 4 տուրի ընթացքում «Մանչեսթերում» հարձակվողական խաղն այնքան էլ չի ստացվում և դրա հետ մեկտեղ Մխիթարյանը գրեթե միշտ զբաղվում է նաև պաշտպանական գործողություններով։

Դրա վառ ապացույցը վիճակագրությունն է։ Անգլիայի առաջնության վերջին 4 տուրի ընթացքում «Յունայթեդը» մրցակցի դարպասը գրավել է 2 անգամ, իսկ մրցակիցները եղել են «Լիվերպուլը», «Չելսին», «Տոտենհեմն» ու «Հադերսֆիլդ Թաունը»։

Եթե թիմը մրցակցի դարպասը չի գրավում, կա միայն ավտոբուսային պաշտպանություն, որը թիմի գլխավոր մարզիչ Ժոզե Մոուրինյոն օգտագործում է առաջնության ուժեղ թիմերի դեմ հանդիպման ժամանակ, բնականաբար, թիմի հարձակվողական ոճի ֆուտբոլիստներն արդյունավետությամբ աչքի չեն ընկնի։ Դրա վառ ապացույցն է թիմի միակ մաքուր հարձակվող Ռոմելու Լուկակույի ու Հենրիխ Մխիթարյանի անարդյունավետ հանդիպումներն առաջնության վերջին 4-5 տուրում։

Այդ ամենը պատահական չէ, քանի որ Մխիթարյանն ու Լուկակուն խաղադաշտում իրարից շատ են կախված։ Այս ամենի հետ մեկտեղ, սակայն, անգլիական մամուլը նշում է, որ թիմի գլխավոր մարզիչ Ժոզե Մոուրինյոն փորձում է փոխել թիմի մարտավարությունն ու նոր դիրք տրամադրել հայ կիսապաշտպանին։

Այն, որ Մխիթարյանի խաղն անկում է ապրել, այլ կարծիք լինել չի կարող։ Այս դեպքում պետք է հաշվի առնել նաև, որ ֆուտբոլիստների մոտ լինում են անկումային շրջաններ, անարդյունավետ խաղեր։ Պետք է միայն ըմբռնումով մոտենալ ու սպասել, թե ե՞րբ կբարելավի իր խաղը հայ կիսապաշտպանը։

Չպետք է նաև մոռանալ, թե ինչպես իր աշխատասիրության, տաղանդի ու համառության շնորհիվ Մխիթարյանը կարողացավ պահեստային նստարանը փոխարինել կանաչ խոտածածկով ու հաղթել անպարտելի թվացող «Special one»-ին։