Սիսիանի քաղաքապետին այլևս ոչինչ նզովքից չի փրկի

Սիսիանի քաղաքապետ Արթուր Սարգսյանն իր համայնքի խնդիրները լուծելու փոխարեն զբաղված է «քաղաքական առևտրով» և «ռազբորկաներով»: Այս «բիզնեսը» նրան օգնում է ապահովել իր եկամուտների կայուն աճը, մնալ անփոխարինելի քաղաքապետի պաշտոնում ու վայելել իր աշխատողների «սերը»՝ թեկուզև առևտրի ու ճնշման մթնոլորտում:

Հիշեցման կարգով նկատենք, որ Արթուր Սարգսյանն այն քաղաքապետն է, ում ծննդյան տոնին նրա աշխատողները զոմբիների էին վերածվել: Նրանք հագել էին իրենց շեֆի պատկերով վերնաշապիկներ ու հենց աշխատավայրում կազմակերպել իսկական «փարթի»:

Տհաճ էր, իհարկե, նայել, թե ինչպես էին վարչական աշխատողները, որոնցից մի քանիսը նույնիսկ ավելի տարիքով էին քաղաքապետից, վերածվել ստրուկների ու ինչպես էին փորձում աստվածացնել իրենց տիրոջը: Ավելորդ չենք համարում նկատել, որ շեֆին քծնելը և թեկուզ նրա համապատասխան վայրը մտնելը ցանկացած մարդու իրավունքն է, կամ գոնե մարդու այն տեսակի, որը հարգանք չունի ինքն իր հանդեպ ու սիրում է ինքն իրեն ստորացնել, բայց գոնե լավ կլինի, այդ մասին աշխարհին իմաց չտալ ու չխայտառակվել:

Մյուս կողմից էլ, ինչպես երևում է, մարդկանց իր առաջ նսեմացնելն ու նրանց իրենց ծառայեցնելն Արթուր Սարգսյանի կյանքի բովանդակությունն է, որից նա բավականություն է ստանում:

Շրջանառվող որոշ լուրերի համաձայն՝ նոյեմբերի 5-ին կայացած ՏԻՄ ընտրությունների արդյունքում «հաղթած» քաղաքապետ Սարգսյանը մնացել է իր պաշտոնում՝ ընտակաշառքների ու մարդկանց ստորացնելու շնորհիվ: Նախընտրական և բուն ընտրական շրջանի մասին մոտավոր պատկերացում կազմելու համար պետք է նշենք, որ Սիսիանում, ընդհանուր առմամբ, ընտրողների թիվը 23 213 է, ընտրություններին մասնակցել է 12 637 մարդ, որոնցից 10 457 ընտրող քվեարկել է Արթուր Սարգսյանի օգտին:

Տարածված այլ լուրերի համաձայն՝ Արթուր Սարգսյանը, նախընտրական շրջանում, սպառնացել է պատժել միավորվող համայնքների ղեկավարներին, եթե իր մրցակցի հանդիպումներին իրենց համայնքներում մարդ հավաքվի։ Մասնավորապես՝ քաղաքապետը սպառնացել է ընտրություններից հետո գործեր հարուցել «դավաճանների» նկատմամբ։

Իր ապահովության համար, որոշ աղբյուրներրի համաձայն, ՀՀԿ-ական թեկնածու Արթուր Սարգսյանը դրսից գողականների է հրավիրել և ԲՀԿ-ական թեկնածու Կարեն Համբարձումյանին ստիպել դուրս գալ պայքարից: Այդ է պատճառը, որ սիսիանցիների գրեթե կեսը չի մասնակցել ընտրություններին ու չի ցանկացել դառնալ Սարգսյանի հպատակը:

Թեկուզ միայն այն, որ տարեց ու երկու ոտքից հաշմանդամ մարդկանց հանրապետական թեկնածուն ստիպել է բերել տեղամաս ու քվեարկել իր օգտին, արդեն իսկ ստվերում է նրա՝ առանց այն էլ անփառունակ կենսագրությունը: Ու այդքանից հետո, եթե նա փորձի ոչ միայն իր դիմանկարը, այլև անունը ոսկե տառերով դաջել տա մարդկանց հագուստներին, ապա դրանից նրա կեղտոտված կենսագրությունը չի մաքրվի:

Քաղաքապետն իր անվանը շունչ ու փայլ տալու համար վկայակոչում է նաև մեծերի խոսքերը: Նա հայտարարել է, թե իբր Համո Սահյանն իրեն գնահատել է որպես խելացի, հնարամիտ ու հեռանկարային: Ավելի լավ կլիներ՝ քաղաքապետն իր անմաքուր կենսագրությամբ չպղծեր հայ մեծերի անունը:

Նրան այլևս ոչինչ նզովքից չի փրկի:

Արմինե Մկրտումյան