Հո դատախազություն չկա՞, որ պարզաբանում տանք. «Վեոլիա ջուր» ընկերությունը կադրային ջարդ է սկսել

Լուսանկարը՝ Iravaban.net-ի

«Վեոլիա ջուր» ընկերության Լոռու մարզային տեղամասի աշխատակիցները բողոքի ակցիա են կազմակերպել: Ընկերությունը կադրային ջարդ է սկսել:

Հիշեցնենք, որ «Վեոլիա ջուր»-ը 25 աշխատակցից պահանջել էր ատեստավորում անցնել: Նրանցից 19-ը հրաժարվել էին ատեստավորումից՝ համարելով այն անօրինական պահանջ։ Դրա պատճառով նրանք ստացել էին նկատողություն: NEWSPRESS.am-ի տեղեկություններով՝ վերջիններիս սպառնացել են նույնիսկ ազատել աշխատանքից:

Աշխատակիցները բողոքի ակցիա են կազմակերպել՝ հույս ունենալով, որ այդ միջոցով կարող են վերականգնել իրենց ոտնահարված իրավունքները և զերծ կմնան աշխատանքից զրկվելու վտանգից:

Բանն այն է, որ ընկերությունն արդեն 5 աշխատակցի ազատել է աշխատանքից: Այժմ թե՛ աշխատանքից ազատվածները, թե՛ նկատողություն ստացած աշխատողները դիմել են դատարան: Մեզ հետ զրույցում աշխատողները նկատեցին, որ մայիս ամսին արդեն իսկ անցել են ատեստավորում և այժմ կրկնակի ատեստավորումը համարում են անօրինական:

Աշխատողները մտավախություն ունեն, որ հնարավոր է բոլորին նույն սկզբունքով ազատեն աշխատանքից:
Դատական գործի ընթացքին ու հնարավոր զարգացումներին ծանոթանալու համար փորձեցինք խոսել աշխատողների շահերը պաշտպանող փաստաբան Հակոբ Ճարոյանի հետ, սակայն բաժանորդի հետ կապ հաստատել չհաջողվեց:

NEWSPRESS.am-ը խնդրի շուրջ փորձեց նաև որոշ պարզաբանումներ ստանալ «Վեոլիա Ջուր» ընկերության մամուլի խոսնակ Մուրադ Սարգսյանից, սակայն նա հորդորեց սպասել մինչև առավոտ:

«Խնդրում ենք ձեզ՝ մինչև առավոտ համբերել, մենք հիմա պարզաբանում ենք կատարվածը, ովքեր հետաքրքված են այս խնդրով, մեր հետագա գործողություններն ու անելիքները կներկայացնենք»,-ասաց նա և հավելեց. «Հո դատախազություն չկա մեր առջև կանգնած, որ պարզաբանումներ տանք, դա մեր անելիքն է, պարզապես որոշ լրատվամիջոցներ սխալ մեկնաբանություններ են անում, դրա համար վաղն ամեն ինչ կներկայացնենք»:

Մուրադ Սարգսյանի դիտարկմամբ՝ խնդիրն այն չէ, ինչպես ներկայացվում է. «Լավ է, որ մարդիկ դատի են տվել և փորձել պաշտպանել իրենց իրավունքները, եթե ուզում են օրենքով ղեկավարվել, ուրեմն մենք դեմ չենք դրան, դա իրենց գործն է, բայց մենք էլ մեր անելիքներն ունենք և պետք է ուսումնասիրություններ անեք՝ կապված խնդրի հետ»,-ասաց նա, չցանկանալով մեկնաբանել, թե արդյոք օրինակա՞ն է կրկնակի ատեստավորման հետ կապված պահանջը:

«Խնդրում եմ, թող մնա, վաղը կպատասխանեմ, վաղը կեսօրին, այո՛»,– ասաց ընկերության մամուլի խոսնակը: