Էս խրենը թող գյուղնախարարն ու վարչապետն ուտեն-զխկտվեն. փողոցային առևտրական (տեսանյութ)

Փողոցային առևտրի խնդիրն առևույթ է թվում լուծված. իրականում այս հարցը շարունակում է մնալ օրակարգում:

Սա, իհարկե, կարելի էր ակնկալել, քանի որ փողոցային առևտուրը վերացնելուց առաջ, սովորաբար, նախ պետք է լուծել այդ առևտրով զբաղվողների հարցը: Սակայն քաղաքապետ Մարգարյանին ամենևին էլ չի մտահոգել այդ մարդկանց խնդիրը. կարևորը, որ իր ղեկավարած քաղաքն առերևույթ գեղեցիկ ու աչք շոյող լինի:

Այլ կերպ ասած՝ այն, որ մաքրված փողոցներն իսկապես աչք են շոյում, միանշանակ է, սակայն քաղաքագլխի կողմից հաշվի չի առնվել, որ գոյություն ունի նաև սոցիալական խնդիր: Ապահովված քաղաքապետը հազիվ թե կարողանա հասկանալ, որ իրենց այգում մի երկու տանձ, խնձոր կամ էլ, օրինակ, ծովաբողկ (ժախուկ, խրեն) աճեցնողները չեն կարող դրանց կրկնակի գինը վճարել ու կանգնել ոչ թե փողոցում, այլ իր կողմից ստեղծված քաղաքակիրթ կոչվող վայրերում:

NEWSPRESS.am-ի թղթակիցը պատահականորեն ականատես եղավ միջադեպի, երբ ոստիկանները հավաքում էին փողոցային առևտրով զբաղվող տղամարդու փոքրիկ տոպրակները, որոնցից յուրաքանչյուրի մեջ մի քանի ծովաբողկ կար, մի քանի սերկևիլ ու երկու կապ ավելուկ:

Ոստիկաններն, ինչ խոսք, «վերևներից» իրենց հրամայվածն էին կատարում, սակայն մարդկային գործոնն այդ պահին բացակայում էր, հատկապես երբ տեսանք, որ մի քանի քայլ նրանից այն կողմ դարձյալ փողոցային առևտրով զբաղվողներ կային, սակայն, ինչպես մեզ ասացին, ոստիկանների հետ նրանք իրենց հարցերը լուծել էին: Թե ինչ ճանապարհով՝ իրենց է հայտնի:

Իսկ մեր «հերոսը» նկատեց, որ որտեղ էլ եղել է, «օրգանի աշխատողները մարդ են կերել» ու նեղացրել իրեն:

«Ի՞նչ է, ես իրավունք չունե՞մ իմ այգում աճեցրած մի էս երկու խրենը կանգնեմ, վաճառեմ»,-վրդովված ասած տղամարդը, ով մի քիչ գինովցած էր, և հենց այդ հանգամանքն էլ շահարկում էին ոստիկանները:

«Էս ի՞նչ խուլիգանություն ա, սա օրե՞նք ա»,-ասաց վրդովված տղամարդն ու ավելացրեց,-«Էս խրենը թող գյուղնախարարն ու վարչապետն ուտեն -զխկտվեն»:

Թեև չի բացառվում նաև, որ նա մի բաժակ «կոնծել» էր զուտ այն պատճառով, որ այսօր դատարկաձեռն է գնալու տուն:

Հարկ է նկատել նաև, որ մինչ մեր նկարահանումները, տարածքում մի քանի «բերետավորներ» կային, ովքեր էլ հենց փորձում էին իրականացնել քաղաքապետի որոշումն ու իրենց վերադասի հրահանգը, սակայն մեր տեսախցիկի երևալու հետ՝ նրանք անհետացան:

Սա էլ մեր տեսախցիկի «կախարդական զորության» արդյունքը: