«ՀԺ». Ապրիլյան պատերազմի վիրավոր Ռոլանդին Գերմանիայում բուժվելու համար պակասում է 15 հազար եվրո

«Հայկական ժամանակ» թերթը գրում է.

«Ապրիլյան պատերազմում վիրավորված Ռոլանդ Սահակյանն ու նրա հարազատները հույս ունեն, որ բարի մարդկանց շնորհիվ կհանգանակվի ևս 15 հազար եվրո, ու երիտասարդը հնարավորություն կունենա մեկնել Գերմանիա՝ վերականգնողական բուժում ստանալու: Ռոլանդ Սահակյանի առողջական վիճակին վերաբերող փաստաթղթերն ուղարկվել են Բոննի կլինիկա, որտեղից դրական պատասխան ու հրավեր է ստացվել: «Այնտեղից պատասխանել են, որ ոտքի կանգնելու շանսեր ունեմ: Ինչքա՞ն պետք է սայլակի վրա մնամ: Ես էլ պետք է ոտքի կանգնեմ, որ կարողանամ օգնել իմ ընտանիքին»,- մեզ հետ զրույցում ասաց նա:

Գերմանիայում վերականգնողական բուժման կուրսի և անհրաժեշտ այլ ծախսերի համար, ըստ Ռոլանդ Սահակյանի, անհրաժեշտ է ընդհանուր առմամբ 55 հազար եվրո: 40 հազարն արդեն հանգանակվել է: Ռոլանդն ասաց, որ պետությունից աջակցություն ստանալու համար չեն դիմել: Դրա կարիքը, թերևս չկար էլ, որովհետև մինչև այժմ ապրիլյան պատերազմում վիրավորվածներին Գերմանիա տեղափոխելու վերաբերյալ համապատասխան հանձնաժողովը միայն բացասական եզրակացություն է տվել: Հայտարարվում էր, որ Հայաստանում նրանց բուժօգնություն տրամադրելու հնարավորությունները չեն սպառվել: Ռոլանդը պետության աջակցությամբ բուժվելու նպատակով մեկ անգամ՝ մոտ մեկ ամսով, տեղափոխվել է Մոսկվա: Երիտասարդն ապրիլյան պատերազմում վիրավորում ստացած զինծառայողներից ամենաերկարն էր մնացել զինվորական հոսպիտալում: Նա ստացել էր ողնաշարի ու նաև ներքին օրգանների բազմաթիվ վնասվածքներ: Ենթարկվել է 12 վիրահատության: Այժմ վերականգնողական բուժում է ստանում «Միքայելյան» հիվանդանոցում՝ մինչև որ կլինի Հայաստանում կառուցվող վերականգնողական կենտրոնի բացումը: Ռոլանդ Սահակյանն Արմավիրի մարզի Այգեշատ գյուղից է: Սեփական միջոցներով որդուն բուժման ուղարկելու հնարավորություն նրա ընտանիքը չունի:

ՎՏԲ-ՀԱՅԱՍՏԱՆ բանկում Ռոլանդ Սահակյանի անունով բացվել են հաշվեհամարներ.

16046053681800 ՀՀ ԴՐԱՄ;

16046053681801 ԱՄՆ ԴՈԼԱՐ;

16046053681802 ԵՎՐՈ;

16046053681803 ՌԴ ՌՈՒԲԼԻ;

SWIFT: ARMJAM22:

Ռոլանդի հեռախոսահամարն է՝ +37493 414 542, հայրիկի՝ Սահակյան Քաջիկի հեռախոսահամարն է՝ +37493 595 634»։

Մանրամասները՝ թերթի այսօրվա համարում