Մի′ զայրացրեք Ռուզան Խաչատրյանին. ի՞նչ կլինի հակառակ դեպքում 

Վերջին օրերին թեժացել է Վիգեն Սարգսյան-Ռուզաննա Խաչատրյան-բանակ եռամարտը, որը երևի թե ինչ-որ ժամանակ պետք է ի հայտ գար: Չէր կարող պատահել, որ բանակում զենքի համն ու հոտը չճաշակած գործիչը դառնար ՀՀ պաշտպանության նախարար: Եթե նախկին նախարար Սեյրան Օհանյանին հարգում էին նրա մարտական անցյալի և ռազմական հաջողությունների համար և ինչ-որ տեղ աչք էին փակում նրա տիկնոջ թեթևամիտ հնարքներին, ապա Վիգեն Սարգսյանի պարագայում խնդիրն ավելի լուրջ է:

Եթե Վիգեն Սարգսյանը մնար քիչ թե շատ աննկատ իր նախկին պաշտոնին՝ ՀՀ նախագահի աշխատակազմի ղեկավար, ապա նման խնդիրները հատկապես սուր չէին դիտվի: Չնայած որ անընդհատ հրապարկվում է այն պաշտոնյաների ցանկը, ովքեր օգտվելով իրենց դիրքից՝ պարզապես խուսափել են ծառայությունից, սակայն լինել Պաշտպանության նախարար և չծառայած լինել, երբ Հայաստանը մեկ ոտքով գտնվում է պատերազմի մեջ՝ սա է խնդիրը:

Ինչ վերաբերում է Սեյրան Օհանյանի տիկնոջը, ապա հասկանալի էր, որ Ս. Օհանյանը պարզապես տարվել էր երիտասարդ կնոջ առավելությունենրով, որը երևի թե անմեղ փաստ էր, և եթե չլիներ տիկնոջ միագույն, միատեսակ և միակերպ լուսանկարվելու մարմաջը, ապա Սեյրան Օհանյանը գրեթե անխոցելի էր ողջ իշխանական էլիտայում: Ռ. Խաչատրյանը ոչ միայն իր լուսանկարներով զայրացնում էր հանրությանը, նաև այդ ջրապտույտի մեջ ներքաշեց ամուսնուն, իսկ թե այդ պատմություններն ի վերջո ինչպես ավարտվեցին՝ հայտնի է:

Այսօր էլ Ռուզան Խաչատրյանն իր գրառումներով փոթորկել է դաշտը. կողմ և դեմ արտահայտվողների պակաս չկա: Թիրախում, ըստ ամենայնի, ՀՀ պաշտպանության նախարար Վիգեն Սարգսյանն է և հատկապես նրա՝ բանակում չծառայելու փաստը:

Նախ պետք է հասկանալ, թե ինչո՞ւ է Ռուզան Խաչատրյանը նման արշավ սկսել Վիգեն Սարգսյանի դեմ. արդեն բավականին ժամանակ է, ինչ Սեյրան Օհանյանն այլևս Պաշտպանության նախարար չէ, և այդ արշավը տիկինը կարող էր սկսել ավելի վաղ՝ հենց սկզբից, հետևություն՝ ինչ-որ մի տեղ թաղված է շան գլուխը:

Զինծառայության վերաբերյալ օրենքի փոփոխությունների շուրջ Ազգային ժողովում խոսում են մարդիկ, ովքեր այս կամ այն կերպ խուսափել են զինծառայությունից՝ իրենց զինծառայության ժամկետն անցկացնելով ՊՆ-ի լրատվական ծառայությունում, որը հարմարավետ տեղ է խուսափելու բանակում ծառայելուց կամ ընդհանրապես չեն ծառայել՝ օգտվելով հովանավորչությունից:

Իհարկե, պետք է նաև այս կատեգորիայի մարդիկ զգուշանան և իրենց թերությունները հանրայնորեն չցուցադրեն. ժամանակին խուսափել են զինծառայությունից, այսօր խոսում են պարտադիր, նաև կանանց զինծառայության մասին: Գուցե Ռուզան Խաչատրյանն այս առումով ինչ-որ գրառում անի և բանակում չծառայածներից և բանակից «թռածների» վերաբերյալ գրառումներով ևս մեկ անգամ ցնցի չծառայածների շարքերը: Երևի թե՝ արժի:

Որքան էլ զարմանալի է, Ռուզան Խաչատրյանն այն անձն է, ով հրաշալի տեղեկացված է չծառայածների մանիպուլյացիաներից և հարկ եղած դեպքում կհանրայնացնի, երևի թե Ռուզան Խաչատրյանին զայրացնել պետք չէ, հակառակ դեպքում՝ հանրության աչքի առջև ոչ միայն Վիգեն Սարգսյանը, այլև բանակի անունից խոսող, սակայն բանակում մեկ օր չծառայածների սպիտակեղենն անգամ «Արիելը» չի կարող լվանալ-մաքրել:

NEWSPRESS.am