Վիգեն Սարգսյանն իր ծառայությունն անց է կացրել Սերժ Սարգսյանի ընդունարանում. Նիկոլ Փաշինյան

Պաշտպանության նախկին նախարար Սեյրան Օհանյան կնոջ՝ Ռուզաննա Խաչատրյանի գրառումը պետք է պատշաճ արձագանք ստանա, քանի որ տպավորություն կա, որ այն վերաբերում է Պաշտպանության գործող նախարար Վիգեն Սարգսյանին: Այդ մասին այսօր Ազգային ժողովի խմբակցությունների ճեպազրույցների ժամանակ ասաց ԱԺ «Ելք» խմբակցության ղեկավար Նիկոլ Փաշինյանը:

«Ճիշտ կլինի, որ այս իրավիճակում Պաշտպանության նախարարը հստակ պարզաբանումներ տա 1992թ. իր՝ բանակ չզորակոչվելու պատճառների մասին, և ճիշտ կլինի, որ այդ պատճառները լինեն ոչ թե բանավոր, այլ փաստաթղթային»,- ասաց Փաշինյանը:

Ըստ նրա՝ Վիգեն  Սարգսյանի պաշտոնական կենսագրության մեջ արված գրառումը, թե 2000-2003 թթ. ծառայել է Հայաստանի Զինված ուժերում, պետք է պարզաբանվի:

«Հայաստանի քաղաքացիները պետք է իմանան, որ Վիգեն Սարգսյանն իր ծառայությունն անց է կացրել Սերժ Սարգսյանի ընդունարանում, ով այդ ժամանակ եղել է Պաշտպանության նախարար, որպես Պաշտպանության նախարարի ռեֆերենտ: Այս առումով, ես կարծում եմ՝ ծայրահեղ անպատշաճ վարքագիծ է, երբ ողջ կյանքը կաբինետներում անցկացրած Պաշտպանության նախարարը կամավորական ծառայության մեկնած կամավորականի պատվոգիրը փորձում է կասկածի տակ դնել կամ այլ լույսի ներքո ներկայացնել»,- նկատեց Փաշինյանն ու հավելեց, որ իրենց խմբակցության ներկայացուցիիչ Արարատ Միրզոյանը, ում մասին խոս կար, իր կարծիքով, Վիգեն Սարգսյանից եռակի-քառակի անգամ ռեալ բանակային ծառայություն է անցել.

«Այս առումով պարոն Սարգսյանը չի կարող նրա հետ համեմատվել»,-ասաց Փաշինյանը:

Ինչ վերաբերում է քննարկվող օրինագծին, ապա, ըստ պատգամավորի, իրենց պնդումը նույնն է՝ բանակից ապօրինի ճանապարհով ազատվողների 85-90 տոկոսը դա անում են առողջական պատճառաբանություներով, և քննարկվող օրինագիծն այդ չարաշահումների դուռը չի փակում, և իրենք չեն տեսնում պատճառ, թե ինչու պետք է փակի: