Հայ ուսանողների ստեղծած սարքն արտադրում է օզոն ու վերացնում օդի բակտերիաները (լուսանկարներ)

Երևանի պետական համալսարանում տեղի ունեցավ «Ռուսալ փառատոն #Գիտություն» խորագրով ինտերակտիվ գիտափառատոնը, որը կազմակերպել էին աշխարհում ալյումինի խոշորագույն արտադրողներից մեկը համարվող «Ռուսալ» ընկերությունը և ԵՊՀ-ն։

Միջոցառմանը մասնակցում էին ՀՀ ԿԳ փոխնախարար Վահրամ Մկրտչյանը, «Ռուսալ Արմենալ» գործարանի գլխավոր տնօրեն Ադոլֆ Զալցմանը, ԵՊՀ ռեկտոր Արամ Սիմոնյանը, պրոռեկտորները, ուսանողներ, հանրապետության մի շարք դպրոցների աշակերտներ և ուրիշներ:

ԵՊՀ ֆոեում գործում էին գյուտարարություն, գիտություն, տեխնոլոգիաներ, ռոբոտաշինություն, ալյումինի արտադրություն և այլն բնագավառները ներկայացնող տաղավարներ, որտեղ մասնագետներն իրականացնում էին փորձեր ու ներկաներին ծանոթացնում էին իրենց արտադրանքներն ու գիտական նորամուծությունները։

NEWSPRESS.am-ի հետ զրույցում «PPT» ընկերության մասնագետ Գոհար Հովհաննիսյանը ներկայացրեց իրենց աշխատանքը, որը նորամուծություն է գիտական աշխարհում։

«Մենք ներկայացնում ենք Օզոնատոր սարքը, որն իրենից ներկայացնում է օզոն արտադրող սարք։ Սարքը մաքրում է տան օդը, վերացնում է բակտերիաներն ու սենյակին տալիս թարմ օդ։ Աշխարհում շատ կան այսպիսի սարքեր, որոնք մաքրում են տան օդը, սակայն մեր նորամուծությունն այն է, որ մենք ներկայացնում ենք նաև օզոն ստանալու սխեման»։

Սարքի հեղինակները ԵՊՀ ուսանողներ են, ովքեր հիմա փորձում են սարքն ավելի կատարելագործել, որ այն կառավարվի տանից դուրս՝ բջջային հեռախոսով։

«Սարքը 20 րոպեում վերացնում է սենյակի ծխախոտի ծուխն ու տալիս թարմ օդ։ Այն կարելի է տեղադրել տներում, սրճարաններում ու փաբերում։ Կարելի է օգտագործել նաև ֆերմաներում, քանի որ մաքուր օդը բարձրացնում է կենդանիների կաթնատվությունը»։

Երիտասարդ ուսանողներն ակնկալում են համագործակցության առաջարկներ ու սարքի արտադրության պատվերներ։

Հավելենք նաև, որ փառատոնի հյուրերը մասնակցեցին նաև ՀՀ ԳԱԱ ֆիզիկական հետազոտությունների ինստիտուտի գիտաշխատող Հայկ Իշխանյանի կողմից ներկայացվող «Հետաքրքրաշարժ գիտություն» խորագրով ինտերակտիվ դասախոսությանը: