Մեկ օր՝ «Հայ մեծերի» հետ. շրջիկ բաց դաս՝ Երևանում (լուսանկարներ)

Երևանի Րաֆֆու անվան թիվ 36 հիմնական դպրոցի ուսուցչուհի Շողիկ Աբրահամյանը կազմակերպել էր շրջիկ բաց դաս՝ 4-րդ դասարանցիների մասնակցությամբ:

Հայ մեծանուն ստեղծագործողներին նվիրված բացօթյա դասը մեկնարկեց Երևանի Ալ. Սպենդիարյանի անվան օպերայի և բալետի ակադեմիական թատրոնի բակից, ուր գտնվում են Սպենդիարյանի, Հովհաննես Թումանյանի և Արամ Խաչատրյանի հուշարձանները:

Փոքրիկ էքսկուրս կատարելով հայ գիր ու գրականության անցած ճանապարհով՝ աշակերտները Շողիկ Աբրահամյանի ուղեկցությամբ մոտեցան Հովհ. Թումանյանի հուշարձանին: Նրանք համառոտ ներկայացրին Թումանյանի կենսագրությունն ու գրողի ստեղծագործություններից տողեր արտասանեցին: Երեխաները նաև ծաղիկներ խոնարհեցին Ամենայն հայոց բանաստեղծի հուշարձանին:

Հաջորդ նպատակակետն Արամ Խաչատրյանի հուշարձանն էր: Այստեղ ևս աշակերտներին ներկայացվեց մեծ ստեղծագործողի, համաշխարհային դասական որակավորված երգահանի կենսագրությունը և դարձյալ ծաղիկներ զետեղեցին նրա քարակերտ արձանին:

Օպերայի մոտից չորրորդցիներն իրենց ծնողների և ուսուցչուհու ուղեկցությամբ շարժվեցին դեպի Մարտիրոս Սարյանի հուշարձան, որը գտնվում է մայրաքաղաքի կենտրոնում՝ Մաշտոցի, Մարշալ Բաղրամյան պողոտաների և Զորյան փողոցի միջև գտնվող՝ Մարտիրոս Սարյանի անվան պուրակում: Աշակերտներից մի քանիսը փոքրիկ պատառիկներ ներկայացրին գեղանկարչի կենսագրությունից և թվարկեցին նրա գործերը, որոնց մեծ մասը գտնվում է թանգարաններում և պատկերասրահներում:

Ծաղիկներ խոնարհելով վարպետի հուշարձանին՝ աշակերտներն այժմ էլ շարժվեցին դեպի Կոմիտասի՝ Սողոմոն Սողոմանյանի արձան, որը գտնվում է Կոմիտասի անվան կոնսերվատորիայի դիմաց՝ ֆրանսիական պուրակում: Երեխաները ներկայացնելով Կոմիտասի կենսագրությունը՝ կատարեցին նաև նրա ստեղծագործություններից «Կաքավիկը», որի խոսքերի հեղինակն է Հովհ. Թումանյանը:

Այնուհետև երեխաները եղան նաև ամերիկահայ գրող Վիլյամ Սարոյանի հուշարձանի մոտ:

Բացօթյա դասի վերջնակետը հայ նոր ճարտարապետության հիմնադիր Ալեքսանդր Թամանյանի հուշարձանն էր: Լինելով Երևան քաղաքի ճարտարապետի արձանի մոտ՝ երեխաներն ամփոփեցին իրենց շրջիկ դասը՝ հաճելի տպավորություններով:

Ճանաչողական և ուսումնական բացօթյա դասի հիշողություններն աշակերտները հավերժացրին լուսանկարներով:

Բոլորի համար սպասված ու հագեցած օրվա ավարտին ծնողները ևս լուսանկարվեցին ուսուցչուհու հետ՝ Թամանյանի արձանի մոտ:

opera 1