Արման Երիցյանի գործը հասել է ՀՔԾ. խառնվել է Սերժ Սարգսյանը (տեսանյութ)

Արման Երիցյանի մայրը՝ Դոնարա Դավթյանն ու տարեց  հայրը՝ ազատամարտիկ Լևոն Երիցյանը, շարունակում են արդարության որոնումներով դռներ թակել: Նրանք պնդում են, որ իրենց  որդին  անմեղ է:

NEWSPRESS.am-ն անդրադարձել էր խնդրին՝ նշելով, որ Արմանի ծնողները սպառնում են ինքնասպան լինել, եթե իրենց որդուն բանտում մի բան պատահի, կամ նրան չարդարացնեն:

Բանն այն է, որ դեռևս 5 տարի առաջ ՀՀ ոստիկանության Մալաթիայի քննչական բաժնում Արման Երիցյանի դեմ քրեական գործ է հարուցվել: Նրան մեղադրում են «Մալաթիա» սննդամթերքի շուկայում լոլիկ վաճառող ոմն Սամվել Մեջլումյանի վրա հարձակվելու ու սառը զենքի գործադրման սպառնալիքով նրանից գումար հափշտակելու մեջ:

Գործի համաձայն՝  Սամվելն Արմանին պարտք է եղել, սակայն չստանալով իր գումարը՝ Արմանը դիմել է զենքի օգնությանը:

Մինչդեռ թե՛ գործով 15  վկաները, թե՛ Արմանի ծնողները վստահեցնում են, որ նման բան չի եղել: Ենթադրյալ տուժողը ևս հերքել է տեղեկությունն այն մասին, թե Արմանն իրեն սպառնացել է դանակով: Արմանին արդարացրել են, և նա ազատ է արձակվել, սակայն 50 օր անց նրան դարձյալ կալանավորել են և դատապարտել 6 տարվա ազատազրկման:

«Արմանն անմեղ է, այս ամենը սարքած գործ է»,-մեզ հետ զրույցում իրենց տեսակետն էին կրկնում ծնողները, ովքեր հարցով դիմել են երկրի նախագահին: Սերժ Սարգսյանը գործն ուղարկել է Հատուկ քննչական ծառայություն՝ այն վերաքննելու:

«Ես շատ շնորհակալ եմ երկրի նախագահին, որ տղայիս գործին ուշադրություն է դարձրել, նրա աջակցությամբ գործը գնացել է Հատուկ քննչական, բայց կուզեմ, որ հետևողական լինի Քննչական կոմիտեի նկատմամբ, որպեսզի իրենց կոլեգաների վարած գործն արդար քննեն, շատ շնորհակալ կլինեմ դրա համար»,-ասում է փոքր-ինչ հույսով լցված մայրը:

Մանրամասները՝ տեսանյութում