«Սա յուրատեսակ ընդվզում է». ուսանողների բողոքի ակցիան հասել է ԱԺ (լուսանկարներ)

Արդեն մեկ շաբաթ է, ինչ ԵՊՀ-ի դիմաց ակցիաներ են կազմակերպում ուսանողներն, ովքեր դեմ են ակադեմիական տարկետման իրավունքի վերացման օրենքին։ Նրանք նշում են, որ ակադեմիական տարկետման իրավունքի վերացումը չի օգնի բանակին, այլ կվնասի գիտությանը։

Այսօր Ազգային ժողովի դիմաց ուսանողները կազմակերպել էին հերթական բողոքի ակցիան։ Մասնակիցները դեմ են խորհրդարանում քննարկվող «Զինծառայության և զինծառայողի կարգավիճակի մասին» նոր օրենքի նախագծին, որն ԱԺ- է բերել Պաշտպանության նախարարությունը։

NEWSPRESS.am-ի հետ զրույցում ակցիայի մասնակից Գեղամ Ասատրյանը նշեց, որ առավոտյան Պատմության ֆակուլտետի դիմաց հավաքված ուսանողներին միացան այլ  ֆակուլտետների ուսանողներ ևս ու որոշեցին երթով շարժվել դեպի Ազգային ժողով։

«Միացան բոլոր այն ուսանողները, ովքեր մտածում են, թե ինչի կարող է հանգեցել օրինագծի ընդունումը։ Այստեղ գալու գլխավոր նպատակն այն է, որ հանդիպենք նախարարի հետ, քանի որ նա նշել է, թե հանդիպել է դժգոհ ուսանողների հետ և զրուցել»,-ասաց Ասատրյանը՝  ընդգծելով, որ փորձել են կապ հաստատել Կորյուն Նահապետյանի հետ և հիմա սպասում են պատասխանի։

«Անկախ նրանից, թե մենք ինչ պատասխան կստանանք, պետք է նշեմ, որ սա յուրատեսակ ընդվզում է։ Մի խումբ ուսանողներ բողոքի ալիք են բարձրացրել և սա տեղային անհանգստություն է։ Ալեք Մանուկյան փողոցից մենք շարժվել ենք այստեղ ու ճանապարհին իրազեկել ենք քաղաքացիներին, թե ինչ նպատակ է հետապնդում մեր ակցիան»,-ասաց ուսանողը:

Ակցիայի մասնակից Գեղամ Ասատրյանն նշեց նաև, որ ինքն անդամ է Facebook-ում ստեղծված «Հանուն գիտության զարգացման» խմբի և հասարակությունը կարող է հետևել ու տեղեկանալ այդ խմբից, թե հետագա ինչ քայլեր կձեռնարկեն ակցիայի մասնակիցները։

Հիշեցնենք, որ նոր օրինագծի համաձայն ուսման համար տարկետում կտրվի միայն այն դեպքում, եթե քաղաքացին պայմանագիր կկնքի Պաշտպանության նախարարության հետ: Ընդ որում, այդ դեպքում արդեն ուսումնառությունից հետո քաղաքացին պարտավորվում է բանակում ծառայել ոչ թե 2, այլ 3 տարի։