Լևոն Հայրապետյանի նկատմամբ ՌԴ իշխանությունները կողմնակալ վերաբերմունք չունեին. Աշոտ Գրիգորյան (տեսանյութ)

Լևոն Հայրապետյանի առեղծվածային կալանավորմանն ու նրա ծրագրերի մասին NEWSPRESS.am-ի հետ զրույցում իր խոհերն է փոխանցել Սլովակիայում Եվրոպայի հայկական միությունների ֆորումի նախագահ Աշոտ Գրիգորյանը:

«Լևոն Հայրապետյանի մահը ցնցեց ողջ հայությանը և տարբեր քննարկումների առիթ դարձավ:

2013 թվականին Լևոն Հայրապետյանի հետ համագործակցություն էինք ձեռնարկել, և ես ամբողջովին տեղյակ եմ նրա կատարած գործերին և այն ծրագրերին, որոնք պատրաստվում էր իրականացնել: Լևոնն իսկապես իր նմանը չուներ. նա պատրիոտ էր և խոշոր բարերար: Լևոն Հայրապետյանի ծրագրերը կապված էին Արցախի բարգավաճման ու անկախության ամրապնդման հետ:

Շատերը հիշում են 2013 թվականի սեպտեմբերը. Եվրոպայի հայկական միությունների ֆորումի 15-րդ համագումարի ժամանակ Լևոն Հայրապետյանը հանդես եկավ քննադատական ելույթով՝ ուղղված ՀՀ նախագահ Սերժ Սարգսյանի դեմ: Նա անխնա քննադատեց Սարգսյանին և մեղադրեց նախագահական ինստիտուտն ամբողջովին ապականելու մեջ:

Լևոն Հայրապետյանը հայտարարում էր, որ Սերժ Սարգսյանի իշխանությունը հանցագործ է, իսկ ինքը՝ նախագահը, հակապետական գործիչ է:

Հայրապետյանը համագումարի ժամանակ ներկայացրեց նաև իշխանափոխության հստակ ծրագիր: Նա սկսեց գործել իր որդեգրած ծրագրով: Այնուհետև, ելնելով իր առողջական խիստ ծանր վիճակից, Հայրապետյանը դադարեցրեց պայքարը և ինչ-որ ժամանակ անհետացավ հասարակության աչքից:

2014 թվականին նրան ներկայացվեց մեղադրանք, և նա կալանավորվեց:

Ես ամենայն պատասխանատվությամբ հայտարարում եմ, որ Լևոն Հայրապետյանի նկատմամբ Ռուսաստանի իշխանությունները կողմնակալ վերաբերմունք չունեին: Լևոնը միշտ հարգանքով էր խոսում ՌԴ նախագահ Վլադիմիր Պուտինի մասին:

Ես ժամանակին կապ եմ հաստատել նաև Լևոն Հայրապետյանի իրավաբանի հետ, ով հայտարարում էր, որ ՌԴ իշխանությունների դեմ բարձրացրած աղմուկը խիստ կխանգարի գործի անկողմնակալ ընթացքին:

Այսինքն, ըստ իմ հավաստի տեղեկությունների, Լևոն Հայրապետյանի դեմ գործում էր ոչ թե Ռուսաստանի, այլ Հայաստանի իշխանությունը:

Ակնհայտորեն Սերժ Սարգսյանը չէր կարող մարսել Լևոն Հայրապետյանի քննադատական այն ելույթները, որոնք արել էր իր դեմ: Նույնիսկ այսօր՝ Հայրապետյանի մահից հետո, Հայաստանի իշխանությունն ակնհայտ անտարբերություն ցուցաբերեց հայրենասեր հայորդու նկատմամբ: Եթե անգամ ավելի ուշ ինչ-որ դրական արձագանքներ լինեն ՀՀ իշխանության կողմից, ապա դրանք կլինեն կեղծ և շինծու:

Ցավալի է, որ առեղծվածային իրավիճակում Լևոն Հայրապետյանը հայտնվեց բանտում հենց այն ժամանակ, երբ ՀՀ նախագահի դեմ լուրջ գործունեություն էր սկսում: Այո՛, սա առեղծվածային է և կունենա իր բացատրությունը:

Ես հայտնում եմ իմ խորին ափսոսանքը Լևոն Հայրապետյանի հարազատներին և ընկերներին, ինչպես նաև մեր ողջ ազգին՝ իր գործունեության գագաթնակետին գտնվող հայորդու կորստի առթիվ»: