Ոստիկանությունը չունի բավարար չափով լիազորություն՝ ապօրինի զենք-զինամթերքի դեմ պայքարելու համար

Ոստիկանության լիազրությունները պետք չէ կրճատել, չպետք է միացնել մի կառույցի, որ լիազորությունը պակասի: Սա ՀՀԿ խմբակցության պատգամավոր, նախկին ոստիկանապետ Ալիկ Սարգսյանի կարծիքն է: Նա այդ մասին ասաց Ազգային ժողովում լրագրողների հետ զրույցի ժամանակ:

Նրա խոսքով՝ ոստիկանությունը չունի բավարար չափով լիազորություն՝ ապօրինի զենք-զինամթերքի դեմ պայքարելու համար: Ալիկ Սարգսյանը նկատում է, որ ոստիկանները պետք է բացեն և անկաշկանդ ստուգեն մեքենաների բեռնախցիկները՝ անկախ նրանից կգտնեն ինչ-որ բան, թե ոչ, մինչդեռ այդ լիազորությունները չկան:

«Կրակոցներ լինում են,ասում եք՝ մեքենայի բեռնախցիկում զենք է եղել: Ախր լիազորություն պետք է լինի դրա դեմ պայքարում»,-նկատեց Ալիկ Սարգսյանը:

Ինչ վերաբերում է հանցագործությունների ավելացմանն ու ոստիկանության թերացումներին, ապա, ըստ նախկին ոստիկանապետի, դրանք ունեն իրենց օբյեկտիվ և սուբյեկտիվ պատճառները, որոնք դարձյալ բխում են լիազորությունների պակասից:

«Զենք-զինամթերքի հանցագործությունների աճը ցույց է տալիս, որ ժողովրդի ձեռքին դա կա: Դրանց դեմ ավելի արդյունավետ պայքար պիտի տարվի: Այսօրվա զգուշավորությունը կաշկանդում է ոստիկաններին: Մոտեցումները փոխվել են: Ոստիկանը եթե ստուգելու դեպքում հաջողության չհասնի, դա աղմուկի պատճառ կդառնա հանրության, միջազգային կառույցների շրջանում, և շատ ոստիկաններ կզրկվեն աշխատանքից: Այս մոտեցումների պարագայում ոստիկանները որդեգրել են զգուշավորություն, որ ամեն տեղ չփորձեն զենք-զինամթերք փնտրել, թե չէ, եվրոպական կառույցների հարձակումներին կենթարկվեն»,- Ալիկ Սարգսյանը: