Նշվել է «Շնողի օրը». Վազգեն Խաչիկյանը մասնակցել է օրվան (լուսանկարներ)

Լոռվա մարզի Շնող գյուղը մեծ հանդիսավորությամբ նշեց համայնքի օրը, որն սկսել է առավոտյան ժամերգությամբ՝ Ս․Սարգիս եկեղեցում։

Շնող գյուղի բնակիչներն իրենց հյուրերին դիմավորեցին աղ ու հացով, զուռնա-դհոլով: Այնուհետև, մեծով ու փոքրով, նրանց ուղեկցեցին դեպի գյուղի Ս․Սարգիս եկեղեցի, որտեղ Ախթալայի տարածաշրջանի հոգևոր հովիվ տեր Հեթում քահանան Թարվերդյանը կատարեց սուրբ սեղանի օրհնության կարգ:

«Շնողի օրը» տոնվում է արդեն 20 տարի: Տարեցները պատմում են, որ սովետական շրջանում այն մեծ շուքով է նշվել: Սակայն վերջին տարիներին կարծես «Շնողի օրը» փորձել են մոռացության մատնել, ու միայն մի քանի տարի առաջ շնողցիները որոշեցին դարձյալ վերականգնել այդ տոնը:

Գյուղի մեծերն այսօր լավ ու վատ են անում տոնի առթիվ կազմակերպված միջոցառումները, դրանք համեմատում անցած տոների հետ ու մատնանշում մի շարք տարբերություններ: NEWSPRESS.am-ի հետ զրույցում Շնողի բնակիչ Ռազմիկ Ջավախյանը նկատեց, որ շատ բան է փոխվել, բայց բոլոր ժամանակների համար մի բան նույնն է մնացել՝ Շնողը միշտ էլ շեն գյուղ է եղել ու ավելի շենացել:

«Շնող նշանակում է՝ շինել, շենացնել. շեն գյուղ է մեր գյուղն ու օր օրի ավելի է շենանում»,- ասում է Ռազմիկ Ջավախյանն ու հպարտությամբ նայում իր չորսբոլորը, ուր իշխում է տոնական տրամադրությունը:

«Գյուղը որքան շեն, ամուր և միասնական է, պետությունն այնքան ուժեղ է»,-ասում է նա ու վստահեցնում, որ շնողցիներն ուր էլ որ լինեն՝ գյուղի տոնին պարտավորություն են զգում իրենց ծննդավայր գալու և բոլորի հետ միասին տոնելու այս օրը:

Այս տարի այդ տոնակատարությանը մասնակցում էր նաև Աշխատանքի և սոցիալական հարցերի նախարարության Սոցիալական ապահովության պետական ծառայության նախկին պետ Վազգեն Խաչիկյանը: Հարկ է նկատել, որ բոլորը մոտենում էին նրան, սեղմում ձեռքն ու ժպտալով ասում, թե որքան ուախ են, որ այսօր Խաչիկյանն իրենց հետ է:

Համայնքի ղեկավար Դավիթ Ղումաշյանն էլ նկատում է, որ մինչ օրս գյուղի տոնը նշվում էր հոկտեմբերի վերջին կիրակին, սակայն այսուհետ շնողցիների օրացույցում հոկտեմբերի 21-ը կարմիրով կնշվի:

Շնողի օրվա առիթով կազմակերպված միջոցառումների շարքում ընգդրկվեց նաև գյուղի վերանորոգված մանկապարտեզի բացումը և այդ հաստատության օրհնության կարգը։

Շինարարական աշխատանքները սկսվել են դեռևս 2016թ. դեկտեմբեր ամսից: Մանկապարտեզը համալրվել է նոր խաղալիքներով, ինչպես նաև կատարվել են բակի բարեկարգման աշխատանքեր: Մանկապարտեզում տեղադրվել են տեսախցիկներ, և այսուհետ երեխաների ծնողները կարող են օնլայն հետևել մանկապարտեզի անցուդարձին: Մանկապարտեզն ունի շուրջ 80 սան: Մանկավարժական անձնակազմն ու երեխաների ծնողներն անհամբերությամբ էին սպասում վերանորոգման աշխատանքների ավարտին:

Նրանք NEWSPRESS.am-ի հետ զրույցում նշեցին, որ ամեն ինչ նոր է մանկապարտեզում, ու իրենք էլ ավելի մեծ հաճույքով են գալիս հիմնարկ:

Մանկապարտեզի վերանորոգումն, իհարկե, գյուղի խնդիրներից մեկն է, որ լուծում է ստացել: Սակայն համայքնապետը նկատում է, որ գյուղում դեռևս բավականին շատ չլուծված խնդիրներ կան: Նա թվարկում է դրանցից առաջնայինները՝ համայքի ջրի ներքին ցանցի վերականգնման ու ճանապարհների վերանորոգման խնդիրները:

Ասում է, թե դրանք բոլորը լուծվող խնդիրներ են, հատկապես որ այդ խնդիրները, Դավիթ Ղումաշյանի խոսքով, արդեն իսկ ընդգրկված են համայնքային հրատապ ծրագրում: