Տարկետման իրավունքի վերացումը բանակին չի օգնի, իսկ գիտությանը` կվնասի

NEWSPRESS.am-ն արդեն տեղեկացրել է, որ մի քանի օր շարունակ ԵՊՀ ուսանողները կազմակերպում են խաղաղ ակցիաներ: Նրանք դեմ են ակադեմիական տարկետման իրավունքի վերացման օրենքին։ Ուսանողները նշում են, որ տարկետման իրավունքի վերացումը չի օգնի բանակին, այլ կվնասի գիտությանը։ Հերթական ակցիայի ժամանակ էլ ԵՊՀ-ի դիմաց հավաքված ուսանողները շարունակում էին վանկարկել․ «Տար-կե-տում լի-նե-լու-ա»։

Մեզ հետ զրույցում նախաձեռնության անդամ Դավիթ Պետրոսյանը նշեց, որ խաղաղ ակցիաները շարունակվելու են, և հասարակության արձագանքից ու քանակից է կախված, թե ինչի կհասնեն։

«Եթե մեր բանակն ունի քանակի խնդիր, ապա պետք չէ կենտրոնանալ հենց ուսանողների վրա, քանի որ կոռուպցիոն խնդիրներ կան նաև բժշկության ոլորտում։ Մենք գիտենք, որ մեկ զինվորը մեծ ուժ է բանակում, բայց տարկետման վերացումը խնդրի կարճաժամկետ լուծման ձև է։ Համակարգի ներսում կան կոռուպցիոն խնդիրներ և այս հարցը պետք է լուծի Կրթության և գիտության նախարարությունը, բայց փոխարենը կարևոր ինստիտուտ են ցանկանում փակել»,-ասաց նա:

Ուսանողներից Աննա Ռաֆյանն էլ նշեց, որ սա ակցիային մասնակցելն իրենցից յուրաքանչյուրի պարտավորությունն է:

«Այս ակցիան դեմ չէ համալսարանին, քանի որ խնդիրը կապված է Պաշտպանության նախարարության և ԿԳ նախարարության հետ։ Սա պայքարի միակ խաղաղ ձևն է, և մենք շարունակելու ենք մեր պայքարը։ Նպատակ կա, որ ցույցով կամ երթով տեղափոխվենք ԿԳ և ՊՆ»,-մեզ հետ զրույցում ասաց Աննան։

Հավելենք նաև՝ Ֆեյսբուքում ստեղծվել է «Հանուն գիտության զարգացման» խումբը, որտեղ տարածվում են ակցիայի մասին տեղեկություններն ու իվենթները։

usanoxner eph