Օրհնությամբ ամփոփվեց նախաայբբենական շրջանը. Մայր Աթոռում առաջին դասարանցիներն օրհնություն ստացան (ֆոտո, վիդեո)

Երևանի Րաֆֆու անվան թիվ 36 հիմնական դպրոցի առաջին դասարանցիները նշեցին «Ա» հնչյուն-տառի ծնունդը, որով ամփոփվեց նախաայբբենական շրջանը:

Մինչ այդ՝ նախօրեին, առաջին դասարանցիներն իրենց դասվար Շողիկ Աբրահամյանի նախաձեռնությամբ այցելեցին Մայր Աթոռ Սուրբ Էջմիածին, որտեղ ստացան հոգևոր հոր օրհնությունը: Մայր տաճարի կամարների ներքո երեխաների շուրթերով հնչեց տերունական «Հայր մեր»-ը: Օրհնվեցին նաև մեսրոպյան տառերը, որով մեկնարկեց աշակերտների տառաճանաչության շրջանը:

Աշակերտներն ու նրանց ծնողները, դասվար Շողիկ Աբրահամյանի հետ միասին նաև մոմեր վառեցին՝ իրենց աղոթքը բարձրացնելով առ Աստված:

Իսկ արդեն միջոցառման օրը երեխաները փայլեցին իրենց գիտելիքով, որը հասցրել էին ստանալ շատ կարճ ժամանակահատվածում:

Դասասենյակը զարդարված էր օրվան համահունչ ոգով ու լցված էր մեսրոպյան շնչով: Երեխաներն իրենց սև ու սպիտակ գեղեցիկ համազգեստներին կրում էին «Ա» տառը:

Ողջունելով իրենց հյուրերին՝ նրանք նույնատիպ տառեր նվիրեցին նաև ներկաներին, ովքեր մեծ հաճույքով կրեցին դրանք:

Բաց դասի ընթացքում փոքրիկները շնորհավորեցին «Ա» տառի ծնունդն ու ներկայացրին շքերթ՝ հագեցած երգերով, բանաստեղծություններով, հանելուկներով ու իհարկե գեղեցիկ բեմականացմամբ:

Երեխաների հետ բեմադրվել էր ներկայացում, որտեղ չար կախարդը գողանում է «Ա» տառն ու կախարդում նրան: Գալիս են մյուս քաջ տառերն ու հաղթում կախարդին: Նրանք «Ա» տառին գտնում են գեղեցիկ ծաղկի միջից:

Բաց դասի ժամանակ կատարվեց նաև «Ա» տառի թագադրում:

Փոքրիկներին օգնության էին եկել նաև նրանց ավագ ընկերները: Հարկ է նկատել, որ այս աշակերտները ևս անցել են Շողիկ Աբրահամյանի թևի տակով ու այսօր մեծ հաճույքով էին մասնակցում իրենց սիրելի դասվարի նախաձեռնած միջոցառմանը: Չորրորդ դասարանի աշակերտները հանելուկներ առաջադրեցին առաջին դասարանցիներին, ովքեր արագ տվեցին ճիշտ պատասխաններ:

Միջոցառումն ստացված էր: Հաճելի պահեր պարգևելու և «Ա» տառի շնորհանդեսն այդքան հետաքրքիր կազմակերպելու համար, տնօրեն Նունե Ղազարյանը շնորհակալություն հայտնեց դասվարին և շնորհավորեց երեխաներին:

«Ես ուզում եմ, որ դուք միշտ այսպես փայլեք ու մեր դպրոցի պատիվը միշտ բարձր պահեք»,-իր խոսքն ուղղեց երեխաներին տնօրենը:

Փոխտնօրեն Էլմիրա Նահապետյանը նկատեց, որ այս միջոցառմանն անհամբեր էր սպասում, քանի որ վստահ էր՝ այն լինելու է հետաքրքիր, հագեցած և գեղեցիկ կազմակերպված:

Շողիկ Աբրահամայնն իր հերթին երեխաներին շնորհավորելով՝ ակտիվության ու պատրաստվածության համար, իր սաներին նվիրեց աստղիկներ:

Եվ իհարկե, օրվա ավարտին, երեխաները համտեսեցին «Ա» տառի ծննդյան տոնական խմորեղենը:

Արմինե Մկրտումյան