«ԵՊՀ բեռը». ուսանողները բողոքի ակցիա են կազմակերպել

Վերջին շաբաթների ընթացքում ամենաբուռն քննարկվող թեմաներից մեկը Պաշտպանության նախարարության առաջարկած փոփոխություններն են, որոնք կապված են «Պաշտպանության մասին» և «Զինվորական ծառայության» մասին օրենքներին։

Այս քննարկումներից անմասն չմնացին նաև ուսանողները։ ԵՊՀ-ի դիմաց նրանք ակցիա էին կազմակերպել։ Ուսանողները նշում էին, որ ակադեմիական տարկետման իրավունքի վերացումը չի օգնի բանակին, այլ կվնասի գիտությանը։

NEWSPRESS.am-ի հետ զրույցում ակցիայի մասնակից Դավիթ Պետրոսյանը նշեց, որ ակցիաները շարունակվելու են, և հարմար պահի իրենց է միանալու ուսխորհուրդը, քանի որ նրանք նույնպես դեմ են այդ օրենքներին։ Դ․ Պետրոսյանն ընդգծեց նաև, որ ապագա գործողությունները կախված կլինեն հասարակական արձագանքից։ Զրույցի վերջում Դավիթ Պետրոսյանը հավելեց, որ հոկտեմբերի 20-ին՝ ժամը 14։00-ին, ԵՊՀ-ի դիմաց տեղի կունենա հերթական ակցիան։

Ակցիայի մասնակիցները ակտիվ են նաև օնլայն տիրույթում և Facebook սոցիալական ցանցում ստեղծվել է «Հանուն գիտության զարգացման» խումբը, որն արդեն ունի մոտ 1600 հետևորդ։ Հոկտեմբերի 11-ին ԱԺ-ում տեղի ունեցած «Պաշտպանության մասին» և «Զինվորական ծառայության» մասին օրենքների քննարկմանը մասնակցում էր նաև ԵՊՀ ռեկտոր Արամ Սիմոնյանը, ով այդ հարցերի հետ մեկտեղ անդրադարձավ նաև բուհերի զեղչերին։

Ռեկտորը ասել էր.

«Բուհերը չափազանց ծանր բեռի տակ են՝ կապված զեղչերի հետ, ոչ միայն մեր բյուջեի 70 տոկոսը, մենք առաջարկում ենք՝ այդ զեղչերը առաջին հերթին պիտի վերաբերեն ծառայած ուսանողներին, բայց զեղչերի մյուս մասը, որը կառավարության որոշմամբ է, օրենքի ուժ ստացած, այնուամենայնիվ, ծանր բեռ է…»:

Փաստորեն ԵՊՀ-ի վր լրացուցիչ բեռ են միակողմանի և երկկողմանի ծնողազուրկ ուսանողներն ու անապահով ընտանիքների ունսանողները։ Հավանաբար, Արամ Սիմոնյանի վերոնշյալ արտահայտությունն էր պատճառը, որ Աբովյան փողոցում՝ մարդկանց ոտքի տակ ընկած էր ԵՊՀ ռեկտորի նկարը: