Երևանում Արամ Մանուկյանի տունը թալանում ու աղտոտում են, Շուշիում՝ պահպանում (լուսանկարներ)

Տարեսկզբին Հայաստանի Առաջին հանրապետության հիմնադիր, ՀՅԴ անդամ Արամ Մանուկյանի՝ Արամի 9 հասցեում գտնվող կիսավեր տան մոտ կազմակերպվեց ակցիա, որին մասնակցում էր նաև Մշակույթի նախարար Արմեն Ամիրյանը։ Ակցիայի ժամանակ նախարարը նշեց, որ շենքը ներառված է «Հին Երևան» նախագծում, որի իրագործումից հետո այն կդառնա այնպիսին, ինչպիսին եղել է: Արմեն Ամիրյանը վստահեցրեց նաև, որ շենքը չի քանդվելու և չի կարող քանդվել, քանի որ պահպանվում է օրենքով: Միջոցառման օրվանից անցել է մոտ 10 ամիս, և ինչպես նշում է այդ տարածքում ապրող Վլադիմիր Սահակյանը․ «Եկան, միջոցառումը կզմակերպեցին, այդ ցուցանակներն այդպես մնացին, քամին քշեց ու տարավ»։

Վ․Սահակյանն ապրում է Արամ Մանուկյանի կիսաավեր տան հարևանությամբ։ Նա մի քանի անգամ քայլեր է ձեռնարկել, որ հսկողություն սահմանվի, ու տունը պահպանվի, սակայն ամեն անգամ գրեթե ապարդյուն է անցել։

«Այս տարածքում բնակիչներ չկան, քանի որ տները քանդեցին և բոլորին տուն տվեցին։ Այստեղ միայն ես եմ ապրում։ 2010 թվականին ես եմ խնդրել քաղաքապետարանին, որ գան ու լուսամուտները փակեն, քանի որ ամեն անցնողը զիբիլ էր գցում, ու տունը դառնում էր զիբիլանոց։ Այդ ժամանակ պահպանվում էին շենքի լուսամուտները, սակայն մի գեղեցիկ օր արթնացա ու տեսա, որ դրանք էլ չկան։ Իմ հորդորներից հետո քաղաքապետարանից եկան ու առաջին հարկի բաց լուսամուտները փակեցին։ Հիմա նույնպես ամեն գիշեր մուրացկանները գալիս են, փակ դարպասը պոկում, բացում ու ներս մտնում։ Ես հետևում եմ, որ դռները չբացեն, բայց չեմ կարող ամեն օր տեսնել, թե ինչ է կատարվում ներսում։ Այս շենքն ափսոս է։ Անկախ ամեն ինչից՝ ճարտարապետական շինություն է»,-NEWSPRESS.am-ի հետ զրույցում ասաց Արամ Մանուկյանի տանը դրկից ապրող հարևանը:

Պահպանվող հուշարձանների ցանկում ներառված այս տանն Արամ Մանուկյանը ապրել է կյանքի վերջին տարիները՝ 1917-1919թթ.:

Արամ Մանուկյանն ավարտելով Շուշիի Ագուլյաց ծխական ուսումնարանը՝ 1890 թվականին ընդունվում է Շուշիի թեմական դպրոցը։ Այդ տարիներին նա ապրել է Շուշիում։ Շուշիում մինչ օրս պահպանվում է Արամ Մանուկյանի տունը։ Տան վրա փակցված է ցուցանակը, տան դռներն ու պատւհանները փակ են, ներսում ու շրջակայքում աղբ չկա, մուրացկաններն այնտեղ չեն գիշերում։ Ադ տարածքում ապրողներն էլ հպարտությամբ են նշում, որ Շուշիում մարդիկ պահպանում են մշակութային հուշարձանները, ինչպես նաև հայ երևելիների տները, որոնք գտնվում են Շուշիում ու Արցախի տարածքում։ Մնում է միայն սպասել ու տեսնել, թե ե՞րբ կիրականացվի «Հին Երևան» նախագիծն, ու ինչ ճակատագիր կունենա Արամի 9 հասցեում գտնվող՝ Հայաստանի Առաջին հանրապետության հիմնադիր Արամ Մանուկյանի տունը։