«Վինար»-ի փոխտնօրենը պատասխան է տալու Յուվեցի Կարոյի փոխարեն

«Վինար» ՍՊԸ-ն արդեն երկու տարի է՝ խաղողի դիմաց չի վճարում պարտքը, որը ներկա պահին կազմում է շուրջ 30 մլն դրամ: Ընկերության փոխտնօրեն Ավետիս Գալստյանը ՀՀ քրեական օրենսգրքի 193-րդ հոդվածով ներգրավվել է որպես մեղադրյալ: Ի դեպ, այս ընկերության տնօրենն է Ավետիք Գալստյանը, իսկ թե ինչո՞ւ է փոխտնօրենը դատվում, պարզ չէ:

2017 թ. սկզբին «Վինար» կոնյակի գործարանի պարտքը կազմում էր 185 միլիոն դրամ: Թեև այս տարիներին ընկերությունը կարողացել է արտահանել իր արտադրանքը, սակայն խաղողագործներին պարտքն այդպես էլ վերջնականապես չի մարել:

«Վինար»-ի 70%-ի սեփականատերը Սանկտ Պետերբուրգում գրանցված «Դարվին» ընկերությունն է, իսկ 30%-ի սեփականատերը՝ Կարո Կարապետյանը, ով ավելի հայտնի է որպես Յուվեցի Կարո:

Դեռևս այս տարվա մարտ ամսին հնարավորություն կար «Վինար»-ի սպիրտը վաճառելու, որպեսզի ընկերությունը կարողանար գումարային պարտավորությունները մարել, սակայն լաբորատոր անալիզներով պարզվել է, որ այդ սպիրտը խաղողի չէ: Հստակ չի նշվում, թե ի՞նչ սպիրտ է, սակայն պարզ է, որ այս ընկերությունը ներքաշված է ոչ մաքուր գործարքների մեջ և փորձում էր անորակ ապրանք իրացնել, որը և գնորդները չեն ցանկացել ձեռքբերել: Արդյունքում ընկերությունը գնաց սնանկացման, սակայն պատասխանատուները հայտարարել են, որ սնանկացման գործընթացը չի ազդի պարտքի մարման վրա:

Նշենք, որ 2016 թ. դեկտեմբերին ՀՀ գյուղատնտեսության նախարարությունը գյուղացիական տնտեսությունների նկատմամբ ունեցած պարտավորությունները չկատարելու համար դիմել է ՀՀ գլխավոր դատախազություն՝ «Վինար» ընկերությանը պատասխանատվության ենթարկելու: Փետրվարի 20-ին ընկերության փոխտնօրենը ներգրավվել է որպես մեղադրյալ:

Սակայն ո′չ «Դարվին» ընկերությունը, ո′չ էլ Յուվեցի Կարոն պատասխանատվության չեն ենթարկվում, այլ ընկերության աշխատակիցը, ով, չի բացառվում, պարզապես հրաման կատարող է: