Վանաձորցի ըմբշամարտիկը 16-րդ անգամ նվաճեց օտար երկրում Հայաստանի հիմնը հնչեցնելու իրավունքը (լուսանկարներ)

ՀՀ վաստակավոր մարզիչ, վանաձորցի 56-ամյա ժորա Հովհաննիսյանն օրերս 16-րդ անգամ ճանաչվեց ազատ ոճի ըմբշամարտի վետերանների աշխարհի առաջնության  հաղթող:

Բուլղարիայի Պլովդիվ քաղաքում ընթացող առաջնության եզրափակչում 62 կգ քաշային կարգում հանդես եկող Ժորա Հովհաննիսյանն ամերիկացի ըմբշամարտիկ Հեջ Նելսոնին շանսեր չտվեց:

Նա 9:1 հաշվով գերազանցեց իր հակառակորդին: Մինչ այդ Հովհաննիսյանը մեկնարկել էր 1/8 եզրափակչից, որտեղ 4:0 հաշվով գերազանցել էր ճապոնացի Սիսումու Հաշիուրային: Քառորդ եզրափակչում հայ վետերանն ուժեղ էր գտնվել ռուս Գենադի Մերեդովից՝ 14:3: Եզրափակչի ուղեգրի համար Հովհաննիսյանը պայքարել էր ռուս Վիկտոր Չերկաշինի հետ և հաղթել 8:2 հաշվով:

Վանաձորցի Ժորա Հովհաննիսյանն ըմբշամարտով սկսել է զբաղվել 12 տարեկանից, ինչին մայրը դեմ է եղել: Բայց նա ոչ ոքի չի լսել ու համառորեն առաջ է շարժվել: Այսօր արդեն, մրցագորգ դուրս եկող իր բոլոր սաներին նույն խորհուրդն է տալիս՝ չընկճվել, չկոտրվել և, իհարկե, պարտություններից չհիասթափվել:

Նա ինքն իր մարզական առաջին լուրջ հաջողությունը գրանցել է 15 տարեկանում` դառնալով Սովետական Միության մրցանակակիր: Առավել լուրջ հաջողությունները, սակայն, վանաձորցի մարզիկը գրանցել է հասուն տարիքում՝ ըմբշամարտի վետերանների աշխարհի առաջնություններում:

Սա արդեն նրա 16-րդ հաղթանակն էր. ասել է թե՝ 16 անգամ բացարձակ առավելությամբ՝ Ժորա Հովհաննիսյանը նվաճել է հաղթողի դափնին ու օտար երկրում հայոց հիմնը հնչեցնելու իրավունքը: Ու չնայած դրան՝ չեմպիոնը չարժանացավ պետական մակարդակով պատշաճ վերաբերմունքի:

ՀՀ սպորտի և երիտասարդության հարցերի նախարար Հրաչյա Ռոստոմյանը, հավանաբար, «տեղյակ չէր» 16-ակի չեմպիոնի ժամանման մասին, հակառակ դեպքում՝  նախարարության ներկայացուցիչներն ամենայն հավանականությամբ կլինեին Ժորա Հովհաննիսյանին դիմավորողների շարքերում:

Հաղթանակով ու փառքով Բուլղարիայից վերադարձած ըմբշամարտիկին «Զվարթնոց» օդանավակայանում դիմավորել են միայն Լոռու մարզի մի քանի պաշտոնյաներ և նրա սաները:

Արմինե Մկրտումյան