Եթե ՀՀԿ-ն չի դատապարտում Արտաշես Գեղամյանի վայրենի պահվածքը, նշանակում է՝ խրախուսում է. Էդմոն Մարուքյան

«Պառլամենտը խոսելու վայր է, եթե խոսելու վայրում մարդիկ կորցնում են կամ չունեն փաստարկներ, դիմում են բռունցքների և բռնության, շատ է ասվում` սա նախորդ խորհրդարանը չի, ցիվիլ խորհրդարան է, ցիվիլ մարդը, որ իրեն տենց է պահում, բա ոչ ցիվիլների՞ց ինչ ակնկալենք»:

Ազգային ժողովում, մեկնաբանելով մեկնաբանելով Նիկոլ Փաշինյանի և Արտաշես Գեղամյանի միջև ծեծկռտուքը՝ լրագրողների հետ զրույցում ասաց «Ելք» խմբակցության պատգամավոր Էդմոն Մարուքյանը:

Դաշինքը դատապարտում է Արտաշես Գեղամյանի պահվածքը:

«Մեր խմբակցությունից 2 պատգամավոր գործուղման մեջ էին, 7 պատգամավորով իրենց 70 հոգանոց ֆրակցիայի բոլոր փաստարկները ջարդուփշուր ենք արել: Էդ ի՞նչ մեծամասնություն է, պետք է իրենք լուրջ մտածեն: Կամ էդ մեծամասնությունը խրախուսում է բռնությունը, չի դատապարտում, կամ ո՞ւմ է ուզում ցույց տա, սա կարևոր հանգամանք է. տեսե՛ք, փաստարկները լավը չէր, բայց մենք բռունցքներով կգործե՞նք: Ռուսաստանի՞ն էին ուզում ցույց տային, իրենց շեֆերի՞ն, ո՞ւմ էին ուզում ծախեին»,- ասաց Մարուքյանը:

Նա չի հավատում Գեղամյանի այն խոսքին, թե չի հարվածել Փաշինյանին.

«Ես Նիկոլ Փաշինյանին եմ հավատում, ոչ թե Գեղամյանին: Մենք գիտենք` ինչ է տեղի ունեցել: Գեղամյանը մոտեցել է, ասել է՝ անունս չտաս, Փաշինյանն էլ ասել է, որ սա խորհրդարան է, ում անունը կուզի, կտա, և Գեղամյանը սկսել է հարվածել: Եթե ՀՀԿ ֆրակցիան չի դատապարտում, նշանակում է՝ խրախուսում է այդ վայրենի, ոչ քաղաքակիրթ, խորհրդարանական վարք ու բարքին ոչ հարիր պահվածքը»,-ասաց պատգամավորը:

Էդմոն Մարուքյանը նշեց նաև, որ դաշինքը հետևողական է լինելու, որպեսզի անպայման ԱԺ Կանոնակարգ-օրենքով ընթացակարգերը գործեն, հանձնաժողով ձևավորվի և քննարկվի Արտաշես Գեղամյանի պահվածքը: