Ամեն մեկդ ուղարկել եք ձեր զավակին Եվրոպա սովորելու, դե ուղարկեք ԵՏՄ որևէ երկիր. Գ. Գորգիսյան

«ԵԱՏՄ-ի տոտալիտար համակարգով ուզում ենք մեր երկիրը դարձնել Ադրբեջա՞ն»: Արձագանելով ԵԱՏՄ-ից ՀՀ-ի դուրս գալու հարցով ԱԺ ժամանակավոր հանձնաժողով ստեղծելու «Ելք» խմբակցության առաջարկի վերաբերյալ հնչած ելույթներին՝ ներկաներին դիմեց «Ելք» խմբակցության պատգամավոր Գևորգ Գորգիսյանը:

Ըստ նրա՝ ելույթների ընթացքում ոչ մի լուրջ պատճառներ չներկայացվեցին, թե ինչու մենք չենք ուզում ստեղծել հանձնաժողովը:

«Ի՞նչ ենք ուզում մենք ստանալ՝ մնալով ԵՏՄ համակարգում: «ԵԱՏՄ-ի տոտալիտար համակարգով ուզում ենք մեր երկիրը դարձնել Ադրբեջա՞ն, թե՞ Ղազախստան կամ Բելառուս: Էդպիսի՞ն եք ուզում դուք տեսնել ձեր զավակների ապագան: Եթե դուք ձեր երեխայի ապագան տեսնում եք Հայաստանում և չեք պատրաստվում վաղը նրան վերցնել և փախնել երկրից, երբ մանդատը վայր դնեք, ուրեմն պետք է մտածեք Հայաստանի ապագայի մասին»,- նշեց Գորգիսյանը:

Նա նշեց, որ Հայաստանն անընդհատ զիջողի դերում է, սակայն պարզ չէ, թե ինչի դիմաց և ինչի համար: Պատգամավորը նշեց, որ պետության քաղաքացին իրավունք ունի իմանալ, թե ինչի դիմաց ենք այս կամ այն բանը զիջում, սակայն մինչ օրս ոչինչ չի ասվել:

«Սա է այն երկիրը, որտեղ ուզում եք ձեր զավակների ապագան տեսնել, թե ամեն մեկդ ուղարկել եք ձեր զավակին Եվրոպա՝ սովորելու և հույս ունեք, որ այնտեղ էլ կմնան: Դե ուղարկեք ԵՏՄ որևէ երկիր սովորելու, ուղարկեք Ղրղզստան սովորելու.. չէ՛, չէ, բոլորը գնում են Եվրոպա»,- նշեց Գորգիսյանը՝ հավելելով, որ հենց այսօր պատգամավորների շարքերում կան Եվրոպայում սովորածներ:

«Գնացել, էնտեղի արժեհամակարգը տեսել եք, եկել եք ԵՏՄ եք տանում»,- եզրափակեց պատգամավորը: