Արցախը միշտ եղել է համաշխարհային օգտագործման գործիք. Աշոտ Մանուչարյան

«Ղարաբաղ» կոմիտեի անդամ Աշոտ Մանուչարյանը վստահեցնում է՝ չկա արցախյան խնդիր, քանի որ կոնֆլիկտն առաջացել է Արցախից դուրս և այն կարելի է համարել ադրբեջանական, Բաքվի:
Նրա խոսքով՝ Արցախը միշտ եղել է համաշխարհային օգտագործման գործիք` սկսած այն պահից, երբ մենք ասում ենք արցախյան խնդիր: Աշոտ Մանուչարյանի դիտարկմամբ՝ տարածքում անընդհատ հրահրվում է պատերազմ:

Խոսելով Ալիևի կողմից փողերի լվացման վերաբերյալ հրապարակումների մասին՝ Աշոտ Մանուչարյանը նկատեց, որ դա նոր չէ, և Եվրոպան երկար ժամանակ է այդ մասին իմացել: Իսկ այն, որ այդ մասին հրապարակումներն այս պահին են արվում, ըստ Աշոտ Մանուչարյանի, ինքնանպատակ չէ:

«Իլհամը չի կատարում Արցախում պատերազմ սկսելու՝ համաշխարհային կառավարման ատյանների պահանջը, որովհետև եռյակը՝ Ռուսաստան-Իրան-Թուրքիա, պահանջում է պատերազմ չսկսել: Արցախյան պատերազմն ամենահեշտ ձևն է՝ պայթեցնելու հայ-թուրք-իրանական ալյանսը, որն այսօր տարածաշրջանում` ելնելով սեփական շահերից, հաստատում է խաղաղություն»,- նշեց Մանուչարյանը:
Աշոտ Մանուչարյանը վստահեցնում է, եթե նրանք պատերազմից դուրս չգան՝ պատերազմի շարունակությունը պայթեցնելու է իրենց:

«Այս երեք պետություններն աշխատում են այնպես անել, որ Կովկասը չպայթի, քանի որ արցախյան պատերազմի դեպքում երեքն էլ միջամտելու են: Այսինքն`մի կողմից կարգավորման խնդիրը կտրուկ բարդացել է` այն իմաստով, որ այն համաշխարհային կառավարման գործիքի է վերածվել, մյուս կողմից` մեզ համար ինչ-որ իմաստով բարենպաստ վիճակ է ստեղծվել, քանի որ ամենաազդեցիկ ուժերը տարածաշրջանում շահագրգռված են, որ այստեղ լինի խաղաղություն»,- ընդգծեց Մանուչարյանը: